ஏழை என் பொன்னுக்கு என் நினைந்து இருந்தாய் இடவெந்தை எந்தை பிரானே!

திருஇடவெந்தை பெருமாளிடம் என் பெண்ணுக்கு என்ன செய்வதாக நினைத்து இருக்கிறாய்!  என்று பெண்ணின் தாய் முறையிடுதல்!

                                                                   லட்சுமி வராகப்பெருமாள்

1108

திவளும் வெண் மதி போல் திரு முகத்து அரிவை* செழுங்கடல் அமுதினில் பிறந்த

அவளும்* நின் ஆகத்து இருப்பதும் அறிந்தும்* ஆகிலும் ஆசை விடாளால்*

குவளை அம் கண்ணி  கொல்லி அம் பாவை சொல்லு* நின் தாள் நயந்திருந்த

இவளை* உன் மனத்தால் என் நினைந்து இருந்தாய்* இடவெந்தை எந்தை பிரானே! 2.7.1

திவளும் வெண் மதி போல் திரு முகத்து அரிவை - ஒளி வீசுகின்ற வெள்ளை நிலவு போல அழகிய முகமுடைய இளைமையான பெண்ணும் 

செழுங்கடல் அமுதினில் பிறந்த அவளும் - செழுமையான கடல் அமுதினில் பிறந்தவளுமான மகாலட்சுமி 

நின் ஆகத்து இருப்பதும் அறிந்தும் ஆகிலும் ஆசை விடாளால் - உன் மார்பில் இருப்பது தெரியும் . இருந்தாலும் (உன் மேல் இருக்கும்) ஆசை விடாமல் (இருக்கும்) 

குவளை அம் கண்ணி  கொல்லி அம் பாவை - கரு நீல அல்லி மலர் போல கண்களை உடையவளும், கொல்லி மலையில் இருக்கும் அழகு பெண் தெய்வத்தை  போன்ற அழுகுடையவளும் (ஆன என் மகள்) 

சொல்லு நின் தாள் நயந்திருந்த இவளை - உன் திருவடியையே விரும்பியிருந்த இவளை

உன் மனத்தால் என் நினைந்து இருந்தாய் - உன் மனத்தால் என்ன நினைத்து கொண்டு இருக்கிறாய் சொல்லு 

இடவெந்தை எந்தை பிரானே - இடவெந்தை என் தந்தையாகிய எம்பெருமாளே!  

  

விளக்கம்:-

ஜகஜோதியா ஒளி வீசி கொண்டிருக்கும் நிலவை போல அழகான முகம் கொண்ட

இளசான பெண்ணானவளும், முன்பு பாற்கடலை கடைந்த போது கடல்  அமுதிலிருந்து தோன்றிய அழகான பொண்ணு மகாலட்சுமி உனது மார்பில் இருப்பது தெரிந்தும்,

உன் மேல் வைத்திருக்கும் ஆசையை விடாமல் இருக்கும் என் மகள். நீல அல்லி மலர்  போல அழகான கண்களை உடையவள் , கொல்லி மலை பெண் தெய்வத்தை போல செம்ம  அழகானவள்,  உன் அழகிய பாதத்தின் மீதே ஆசை வைத்திருக்கும் இவளை பற்றி உன் மனதில் அப்படி என்னதான் நினைத்து கொண்டிருக்கிறாய் சொல்லு! திருஇடவெந்தை  எந்தை பிரானே!

1109

துளம் படு முறுவல் தோழியர்க்கு அருளாள்* துணை முலை சாந்து கொண்டு அணியாள்*

குளம் படு குவளைக் கண் இணை எழதாள்* கோல் நல் மலர் குழற்கு அணியாள்* 

வளம் படு முந்நீர் வையம் முன் அளந்த* மால் என்னும் மால் இன மொழியாள்*

இளம் படி இவளுக்கு என் நினைந்து இருந்தாய்* இடவெந்தை எந்தை பிரானே! 2.7.2 

துளம் படு முறுவல் தோழியர்க்கு அருளாள் -  மாதுளம் பழம் (போன்ற பற்களை  கொண்டவளான என் மகள்) தோழிகளுக்கு முன்பு புன்னகைப்பதில்லை  

துணை முலை சாந்து கொண்டு அணியாள் - (அழகுக்கு ஏற்றவாறு சிறப்பா) பொருந்திய முலைகளில் சந்தனம் பூசி அலங்கரித்து கொள்ளவதில்லை 

குளம் படு குவளைக் கண் இணை எழதாள் - குளத்தில் பூக்கும் கரு நீல அல்லி மலரை போன்ற கண்களில் மை இட்டு கொள்வதில்லை 

கோல் நல் மலர் குழற்கு அணியாள்  - அழகிய நல்ல மலர்களை கூந்தலில் அணிவதில்லை 

வளம் படு முந்நீர் வையம் முன் அளந்த - வளம் மிக்க கடல் சூழ்ந்த உலகத்தை முன்பு (தன் திருவடியாலே) அளந்த 

மால் என்னும் மால் இன மொழியாள் - பெருமாள் என்று சொல்லும் காம  மயக்கத்தோடு கலந்த பேச்சை உடையவள்

இளம் படி இவளுக்கு என் நினைந்து இருந்தாய் - இளமையான பெண்ணான இவளுக்கு என்ன (செய்வதாக) நினைத்து இருக்கிறாய் 

இடவெந்தை எந்தை பிரானே - - இடவெந்தை என் தந்தையாகிய எம்பெருமாளே! 

விளக்கம்:-

மாதுளம் பழத்தின் உள்ளே பொடி பொடியா இருக்கும் இனிப்பான விதையை போன்ற பற்களை கொண்ட என் மகள், அவளோட தோழிகளுக்கு கூட புன்னகைப்பதில்லை.  உடல் அழகுக்கு ஏத்தா மாதிரி நச்சுனு இருக்கும் அழகான பெரிய முலைகளுக்கு சந்தனம் பூசி கொள்வதில்லை.  குளத்தில் பூக்கும் 

நீல அல்லி மலரை போல அழகான கண்களுக்கு மை இட்டு கொள்வதில்லை. அழகான நல்ல மலர்களை தன் கூந்தலில் வைத்து கொள்வதில்லை.

ஆனால் எப்போதும் முத்து, பவளம் என்று நிறைந்திருக்கும் வளம் மிக்க கடல் சூழ்ந்த உலகத்தை, முன்பு தன் அழகிய திருவடிகளால் அளந்த பெருமாள் என்று காமம் கலந்த மயக்கத்தோடு பேசி கொண்டிருக்கிறாள். இளசான அழகிய பெண்ணான இவளுக்கு  என்ன செய்வதாக நினைத்து கொண்டிருக்கிறாய் திருஇடவெந்தை எந்தை பிரானே! 

                                                                அழகிய என் பெண்

1110

சாந்தமும் பூணும் சந்தனக் குழம்பும்* தட முலைக்கு அணியிலும்  தழல் ஆம்*

போந்த வெண் திங்கள் கதிர் சுட மெலியும்* பொரு கடல் புலம்பிலும்  புலம்பும்* 

மாந்தளிர் மேனி வண்ணமும் பொன் ஆம்* வளைகளும் இறை நில்லா*

எந்தன் ஏந்திழை இவளுக்கு என் நினைந்து இருந்தாய்* இடவெந்தை எந்தை பிரானே! 2.7.3

சாந்தமும் பூணும் சந்தனக் குழம்பும் - சந்தனமும், நகைகளும், நீர் கலந்த சந்தனமும் 

தட முலைக்கு அணியிலும்  தழல் ஆம் - பெரிய முலைக்கு அணிந்து கொண்டாலும் நெருப்பாம் 

போந்த வெண் திங்கள் கதிர் சுட மெலியும் - வரும் வெள்ளை நிலாவும் சூரியன் போல சுட (உடல்) மெலிகிறது 

பொரு கடல் புலம்பிலும்  புலம்பும் - அலை அடிக்கும் கடல் கோஷம் எழுப்பினாலும் இவள் கதறுவாள் 

மாந்தளிர் மேனி வண்ணமும் பொன் ஆம் - புதிதாக துளிர் விட்ட இலை போல வழவழப்பான உடல் நிறமும் (காம மயக்காதால்) பொன் நிறமாம் 

வளைகளும் இறை நில்லா - (கை) வளையல்களும் சிறிதும் நிற்காமல் (கழண்டு விழுகிறது) 

எந்தன் ஏந்திழை இவளுக்கு என் நினைந்து இருந்தாய் - ஏந்திழை எந்தன் - நகைகள் அணிந்த என்னுடைய (பெண்ணான) இவளுக்கு என் நினைந்து இருந்தாய் 

இடவெந்தை எந்தை பிரானே - இடவெந்தை என் தந்தையாகிய பெருமாளே! 

விளக்கம்:-

குளிர்ச்சியான சந்தனமும், அழகான நகைகளும், தண்ணீர் கலந்த சந்தனமும் அழகான பெரிய முலைகளுக்கு அணிந்து கொண்டிருந்தாலும், அவையெல்லாம் இவளுக்கு நெருப்பு போலவே எரிப்பதாக எண்ணுகிறாள். குளிர்ச்சியாக வானத்தில் தெரியும் வெள்ளை நிலவும் இவளுக்கு நெருப்பு போல சுடுவதால் உடம்பும் ஒல்லியாகி கொண்டே போகிறது.

அதுமட்டுமல்ல அலைகள் சரமாரியாக அடித்து கொண்டு ஆர்ப்பரிப்பதை  பார்த்து இவளும் ஓ! என்று கத்துகிறாள்.  மாநிறம் கொண்ட அழகான வழவழப்பான உடலும்  காம மயக்கத்தால் பொன் நிறமாக மாறியிருக்கிறது. கையில் வளையல்களும் சிறிதும் நிற்காமல் கழண்டு விழுகிறது.

அழகான நகைகள் அணிந்துள்ள என் பெண்ணான இவளுக்கு  என்ன செய்வதாக நினைத்து கொண்டிருக்கிறாய் திருஇடவெந்தை  எந்தை பிரானே! 

1111

ஊழியின் பெரிதால் நாழிகை! என்னும்* ஒண் சுடர் துயின்றதால்! என்னும்* 

ஆழியும் புலம்பும்! அன்றிலும் உறங்கா* தென்றலும் தீயினில் கொடிதாம்* 

தோழி ஓ! என்னும் துணை முலை அரக்கும்* சொல்லுமின் என் செய்கேன்? என்னும்* 

ஏழை என் பொன்னுக்கு என் நினைந்து இருந்தாய்* இடவெந்தை எந்தை பிரானே! 2.7.4

ஊழியின் பெரிதால் நாழிகை! என்னும் - நாழிகை ஊழியின் பெரிதால் என்னும் - ஒரு சில நிமிடங்கள் ஒரு யுகத்தை விட பெரிதாக தோன்றுகிறது என்கிறாள் 

ஒண் சுடர் துயின்றதால்! என்னும் - ஒளிமிக்க சூரியன் தூங்கி விட்டதா என்கிறாள் 

ஆழியும் புலம்பும்! அன்றிலும் உறங்கா - (இரவில்) கடலும் அலை வீசி புலம்புகிறது ஆகிலும் (இவள்) தூங்காமல் இருக்கிறாள் 

தென்றலும் தீயினில் கொடிதாம் - தென்றல் காற்றும் நெருப்பை விட கொடுமையாக இருக்கிறதாம் 

தோழி ஓ! என்னும் துணை முலை அரக்கும் - ஐயோ! தோழி (என்ன செய்வேன்) என்கிறாள், (வெறுப்பில்) இரண்டு முலைகளையும் கசக்குகிறாள் 

சொல்லுமின் என் செய்கேன்? என்னும் - சொல்லுங்கள் (நான்) என்ன செய்வேன்? என்று கேட்கிறாள் 

ஏழை என் பொன்னுக்கு என் நினைந்து இருந்தாய் - (உன் மேல் அளவில்லாத காதல் கொண்ட) ஏழையான என் (செல்ல) தங்கத்துக்கு (என்ன செய்வதாக) நினைத்து  இருக்கிறாய் 

இடவெந்தை எந்தை பிரானே - திருஇடவெந்தை என் தந்தையாகிய பெருமாளே!

விளக்கம்:-

அரை மணி நேரம் கூட ஒரு பெரிய யுகமே கடந்ததை விடவும் பெரிதாக உணர்கிறாள். இவ்வளவு நேரமாகியும் உதிக்காமல் இருக்கும் ஒளியுடைய சூரியன் தூங்கி விட்டதா? என்று கேட்கிறாள். கடலும் நள்ளிரவில் அலைகளால் ஓசை எழுப்புகிறது! ஆனாலும் இவள் தூங்குவதில்லை!. மென்மையான தென்றல் காற்றும் இவளுக்கு சுடும் நெருப்பை விட கொடுமையாக உணர்கிறாள்.

ஓ!! தோழி...! என்று கதறுகிறாள். இரண்டு முலைகளையும் வெறுப்பால் கசக்கு கசக்கு என்று கசக்குகிறாள். சொல்லுங்கள் நான் என்னதான் செய்வது? என்று கேட்கிறாள். பெரும் காமம் கலந்த காதல் நோயால் அவதிப்பட்டு இருக்கும் ஏழையான என் செல்ல தங்கத்துக்கு என்ன செய்வதாக நினைத்து கொண்டிருக்கிறாய்! திருஇடவெந்தை எந்தை பிரானே!

1112

ஓதிலும் உன் பேர் அன்றி மற்று ஒதாள்* உருகும் நின் திரு உரு நினைந்து*

காதன்மை பெரிது கையறவு  உடையள்* கயல் நெடுங்கண் துயில் மறந்தாள்*

பேதையேன் பேதை பிள்ளைமை பெரிது* தெள்ளியள் வள்ளி நுண் மருங்குல்* 

ஏதலர் முன்னா என் நினைந்து இருந்தாய்* இடவெந்தை எந்தை பிரானே! 2.7.5

ஓதிலும் உன் பேர் அன்றி மற்று ஒதாள் - வாய் விட்டு கூறினாலும் உன் பேர் தவிர மற்றவை கூறமாட்டாள் 

உருகும் நின் திரு உரு நினைந்து - நின் திரு உரு நினைந்து உருகும் - உன் திருஉருவம் கண்டு உருகுவாள் 

காதன்மை பெரிது கையறவு  உடையள் - (உன் மேல் வைத்திருக்கும்) காதல் பெரியது. செயலற்ற நிலையில் இருக்கிறாள் 

கயல் நெடுங்கண் துயில் மறந்தாள் - கெண்டை மீன் போல பெரிய கண்கள் (கொண்ட என் மகள்) தூக்கத்தை மறந்தாள்

பேதையேன் பேதை பிள்ளைமை பெரிது - கள்ளம் கபடம் இல்லாத (என்) பெண்ணின் சிறு பிள்ளைத்தனம் பெரியதாக உள்ளது 

தெள்ளியள் வள்ளி நுண் மருங்குல் - தெளிவானவள், கொடி (போல) மிக சிறிய இடுப்பை உடையவள் 

ஏதலர் முன்னா என் நினைந்து இருந்தாய் - எதிரிகள் முன்னால் (இவளுக்கு) என்ன நினைத்து இருந்தாய் 

இடவெந்தை எந்தை பிரானே - திரு இடவெந்தை என் தந்தையாகிய பெருமாளே! 

 விளக்கம்:-

வாய் விட்டு கூறினாலும் உன் பேர் தவிர மற்றவற்றை கூறமாட்டாள். உன் அழகிய உருவத்தை கண்டு உள்ளம் உருகுவாள்.உன் மேல் வைத்திருக்கும் காதலும் அதிகமாயிருப்பதால் என்ன செய்வதென்றே தெரியாமல் இருக்கிறாள்.கெண்டை மீனை போல பெரிய கண் கொண்ட இவள் தூங்குவதையே மறந்தாள். வெளி உலகு தெரியாத என் பெண்ணின் குழந்தை தனமும் பெரியதாக உள்ளது.

ஆனாலும் உன்னை பற்றி தெரிந்து கொள்வதில் தெளிவுள்ளவளாய் இருக்கும், வள்ளி கொடி போல வளைஞ்சி நெளிஞ்சி இருக்கும் அழகிய இடுப்பை கொண்ட இவளுக்கு, தெய்வமே இல்லை என்று சொல்பவர்களுக்கு முன்பாக, அவர்களுக்கு சாதகமாக நீ ஒருவன் இல்லை என்பது போல இப்பெண்ணை  தவிக்க விடுவாயா? நீ இருக்கிறாய் என்று நிரூபிக்க இவளுக்கு அருள்வாயா? என்ன செய்வதாக நினைத்து கொண்டு இருக்கிறாய் திருஇடவெந்தை எந்தை பிரானே! 

1113

தன் குடிக்கு ஏதும் தக்கவா நினையாள்* தடங்கடல் நுடங்கு எயில் இலங்கை* 

வன் குடி  மயங்க வாள் அமர் தொலைத்த* வார்த்தை கேட்டு இன்புறும் மயங்கும்*

மின் கொடி மருங்குல் சுருங்க மேல் நெருங்கி* மென் முலை பொன் பயந்திருந்த*

என் கொடி இவளுக்கு என் நினைந்து இருந்தாய்* இடவெந்தை எந்தை பிரானே! 2.7.6

தன் குடிக்கு ஏதும் தக்கவா நினையாள்  - தன் குலத்திற்கு (என்று) எதுவும் பொருத்தமா நினைக்கமாட்டாள் 

தடங்கடல் நுடங்கு எயில் இலங்கை  - பெரிய கடலோடு வளைந்த மதில் இலங்கை 

வன் குடி  மயங்க வாள் அமர் தொலைத்த - கொடிய குலத்தவர் (அரக்கர்கள்) மயங்கும்படி  கொடிய போரில் (அவர்களை) அழித்த 

வார்த்தை கேட்டு இன்புறும் மயங்கும் - செய்தியை கேட்டு இன்புறும் மயங்கும் 

மின் கொடி மருங்குல் சுருங்க மேல் நெருங்கி - மின்னல் கொடி போல (இருக்கும்) இடை சுருங்க மேலே நெருங்கி 

மென் முலை பொன் பயந்திருந்த - மென்மையான முலையில் பொன் நிறமாகி இருந்த 

என் கொடி இவளுக்கு என் நினைந்து இருந்தாய் - என் பெண் இவளுக்கு என்ன செய்வதாக நினைத்து கொண்டு இருக்கிறாய் 

இடவெந்தை எந்தை பிரானே - திருஇடவெந்தை என் தந்தையாகிய பெருமாளே !

விளக்கம்:-

துன்பம் நீக்கினால் நீக்கு! நீக்கவிட்டாலும் சரி! உன் விருப்பபடியே நடக்கட்டும்! நான் உன்னிடமே அன்பு செலுத்துவேன் என்று சொல்லும் அளவுக்கு இறை பக்தி கொண்ட பெருமை வாய்ந்த குலத்தில் பிறந்த இவள் தன் குலத்திற்கு தகுந்தவாறு நினைக்காமல் நீ உடனடியாக வேண்டியதை கொடுக்க வேண்டும் என்பது போல அவசரபடுகிறாள்.

முன்பு சீதையை கடத்திய இராவணனிடமிருந்து சீதையை மீட்க பெரிய கடலும்,  வளைந்த மிக பெரிய சுற்று சுவர்களும் கொண்ட இலங்கையில் கொடிய அரக்கர்களிடம் போர் புரிந்து அவர்களை அழித்த செய்தியை கேட்டு நீ சீதாவுக்காக என்னவெல்லாம் செய்கிறாய்  என்று எண்ணி சந்தோசமடைகிறாள். அதே போல் தனக்கு ஒன்றும் செய்யவில்லையே என்று எண்ணி மயங்குகிறாள் 

உன் மேல் கொண்ட காதலால் மின்னல் போலவும், வஞ்சி கொடி போலவும் நச்சன்னு இருக்கும் இடை சுருங்க, வழவழன்னு இருக்கும் முலைகளும் ஒன்றோடொன்று மார்பின் மேலே நெருங்கி பொன்னிறமாக மாறி இருக்கிறது.  கொடி போன்ற அழகான என் செல்ல பெண்ணுக்கு என்ன செய்வதாக நினைத்து இருக்கிறாய் திரு இடவெந்தை எந்தை பிரானே!  

1114
உளம் கனிந்து இருக்கும் உன்னையே பிதற்றும்* உனக்கு அன்றி எனக்கு அன்பு ஒன்று இலளால்*

வளங்கனிப் பொழில் சூழ் மாலிருஞ்சோலை* மாயனே! என்று வாய் வெருவும்*

களங்கனி முறுவல் காரிகை பெரிது* கவலையோடு அவலம் சேர்ந்திருந்த* 

இளங்கனி இவளுக்கு என் நினைந்து இருந்தாய்* இடவெந்தை எந்தை பிரானே!2.7.7 

உளம் கனிந்து இருக்கும் உன்னையே பிதற்றும் - உள்ளம் பழுத்து இருக்கும் உன்னை பற்றியே பேசுகிறாள் 

உனக்கு அன்றி எனக்கு அன்பு ஒன்று இலளால் - உன்னிடம் அன்றி என்னிடம் அன்பு சிறிதும்   இல்லை 

வளங்கனிப் பொழில் சூழ் மாலிருஞ்சோலை - செழிப்பான பழங்கள் கொண்ட சோலைகள் சூழ்ந்த திருமாலிருஞ்சோலை 

மாயனே! என்று வாய் வெருவும் – மாயனே! என்று வாயில் கூறி கொண்டிருக்கிறாள் 

களங்கனி முறுவல் காரிகை - களாப்பழம் போன்ற புன்னகையும் அழகும் கொண்டவள் 

பெரிது கவலையோடு அவலம் சேர்ந்திருந்த - பெரிய கவலையோடு உடல் அசதியும் சேர்ந்திருந்த 

இளங்கனி இவளுக்கு என் நினைந்து இருந்தாய் - இளமையான பெண்ணான இவளுக்கு என்ன (செய்வதாக) நினைத்து இருக்கிறாய் 

இடவெந்தை எந்தை பிரானே - திரு இடவெந்தை என் தந்தையாகிய பெருமாளே !

 விளக்கம்:-

உள்ளம் பழுத்து தெளிவா இருக்கும் என் பெண் உன்னை பற்றியே எந்நேரமும் பேசி கொண்டிருக்கிறாள். உன்னிடம் மட்டுமே அன்பு செலுத்தும் இவள் உன்னை தவிர என் மேல் கூட இவளுக்கு அன்பு இல்லை.

சுவையான கொழுத்த பழங்கள் நிறைய இருக்கும், சோலைகள் சூழ்ந்த திருமாலிருஞ்சோலை மாயனே! என்று வாயால் கூறி கொண்டிருக்கிறாள். களாப்பழம் இனிப்பதை போல அவள் புன்னகையும் இனிக்கும் அளவுக்கு  ரொம்ப அழகானவள்.

பெரிய கவலையோடு உடலும் நொந்து போய் இருக்கும், இளமையான பெண்ணான இவளுக்கு என்ன செய்வதாக நினைத்து இருக்கிறாய்! திரு இடவெந்தை எந்தை பிரானே! 

                                                                        திருப்புட்குழி

1115

அலம் கெழு தடக்கை ஆயன் வாய் ஆம்பற்கு* அழியுமால் என் உள்ளம்! என்னும்*

புலம் கெழு பொரு நீர்ப் புட்குழி பாடும்* போதுமோ நீர்மலைக்கு என்னும்* 

குலம் கெழு கொல்லிக் கோமள வல்லிக்* கொடி இடை நெடு மழைக் கண்ணி*

இலங்கு எழில் தோளிக்கு என் நினைந்து இருந்தாய்* இடவெந்தை எந்தை பிரானே! 2.7.8

அலம் கெழு தடக்கை ஆயன் வாய் ஆம்பற்கு -  கலப்பை கொண்ட பெரிய கையையுடைய கண்ணன் வாயில்  வைத்து ஊதும் குழல் ஓசைக்கு 

அழியுமால் என் உள்ளம்! என்னும் - அழிகிறதே! என் உள்ளம் என்கிறாள் 

புலம் கெழு பொரு நீர்ப் புட்குழி பாடும் -  வயல்கள் சூழ்ந்த (அதற்க்கு) ஏற்றார்போல நீர்கள் உடைய திருப்புட்குழி பெருமாளை பற்றி பாடுகிறாள் 

போதுமோ நீர்மலைக்கு என்னும் - போலாமா திருநீர்மலைக்கு என்கிறாள் 

குலம் கெழு கொல்லிக் கோமள வல்லிக் - நல்ல மக்கள்  கொண்ட கொல்லி மலை  அழகிய பெண் 

கொடி இடை நெடு மழைக் கண்ணி - கொடி (போன்ற) இடை, பெரிய மழை (போல) கண்களில் நீர் ஊற்றும் கண்ணை உடையவள் 

இலங்கு எழில் தோளிக்கு என் நினைந்து இருந்தாய் - பிரகாசமான அழகு தோள்களை கொண்டவளுக்கு என்ன (செய்வதாக) நினைத்து இருக்கிறாய் 

இடவெந்தை எந்தை பிரானே!  - திரு இடவெந்தை என் தந்தையாகிய பெருமாளே! 

விளக்கம்:-

கலப்பை கொண்ட அழகான பெரிய கைகளை உடைய பலராமனாக பிறந்தவனும், பசு மேய்க்கும் குலத்தில் பிறந்தவனுமான கண்ணன்  வாயில் வைத்து ஊதும் புல்லாங்குழலின் ஓசைக்கு அழிகிறதே! எனது உள்ளம் என்கிறாள். 

சுற்றிலும் வயல்கள் சூழ்ந்த, வயல்களுக்கு ஏற்றார்போல அழகான நீர்நிலைகளும் பொருந்தியுள்ள, காஞ்சிபுரத்தில் உள்ள திருப்புட்குழி கோவிலை பற்றி ஆசையோடு பாடுகிறாள். திடீரென்று திருநீர் மலை பெருமாள் ஞாபகம் வர இப்பவே போலாமா! சென்னையிலுள்ள திருநீர்மலைக்கு என்கிறாள் .

நல்ல மக்கள் வாழும் கொல்லி மலையில் இருக்கும் மற்றவர்களை வசீகரிக்கும் பேரழகு கொண்ட கொண்ட, கொல்லி பாவை பெண் தெய்வத்தை போன்று ரொம்ப அழகான என் பெண், கொடி போல வளைந்து நெளிந்து நச்சுன்னு இருக்கும் இடை கொண்டவள்.

உன்னை நினைத்து ஏங்கியதோடு மட்டுமில்லாமல் அவளுக்கு இன்னும் திருமணம் ஆகவில்லையே!! என்ற ஏக்கத்தோடு சர சரன்னு ஊற்றும் மழை போல கண்களில் இருந்து கண்ணீர் வந்து கொண்டிருக்கிறது . பிரகாசமான பளபளன்னு இருக்கும் அழகிய மென்மையான தோள்களை கொண்ட என் பெண்ணுக்கு அப்படி என்னதான் செய்வதாக நினைத்து கொண்டிருக்கிறாய்! திரு இடவெந்தை எந்தை பிரானே! 

                                                                           திருநீர்மலை

1116

பொன் குலாம் பயலை பூத்தன மென் தோள்* பொரு கயல் கண் துயில் மறந்தாள்*

அன்பினால் உன் மேல் ஆதரம் பெரிது* இவ் அணங்கினுக்கு உற்ற நோய் அறியேன்* 

மின் குலாம் மருங்குல் சுருங்க மேல் நெருங்கி* வீங்கிய வன முலையாளுக்கு* 

என் கொல் ஆம்! குறிப்பில் என் நினைந்து இருந்தாய்* இடவெந்தை எந்தை பிரானே! 2.7.9

பொன் குலாம் பயலை பூத்தன மென் தோள் - தங்கம் போல (காமம் கலந்த காதலால்) பசலை நிறம் கொண்ட மென்மையான் தோளை உடையவள்  

பொரு கயல் கண் துயில் மறந்தாள் - சண்டை போடும் கயல் மீன்களை போல கண்ணை கொண்ட இவள் தூக்கத்தையே மறந்தாள்

அன்பினால் உன் மேல் ஆதரம் பெரிது - அன்பினால் உன் மேல் இருக்கும் ஆசை அதிகமாகி கொண்டே போகிறது 

இவ் அணங்கினுக்கு உற்ற நோய் அறியேன் - இப்பெண்ணுக்கு உண்டான் நோய் எது என்று தெரியவில்லை 

மின் குலாம் மருங்குல் சுருங்க மேல் நெருங்கி - மின்னல் போல இருக்கும் இடை சுருங்க (அந்த சுருக்கம் மார்பின்) மேலே நெருங்கி 

வீங்கிய வன முலையாளுக்கு - வீங்கிய அழகு முலை கொண்டவளுக்கு 

என் கொல் ஆம்! குறிப்பில் என் நினைந்து இருந்தாய் - என்ன ஆகுமோ! உன் உள்ளத்தில் என்ன (செய்வதாக) நினைத்து இருக்கிறாய் 

இடவெந்தை எந்தை பிரானே!  - திரு இடவெந்தை என் தந்தையாகிய பெருமாளே!

 விளக்கம்:-

உன் மேல் கொண்ட காதலால் உடலின் நிறம் தங்கம் போல பசலை பூத்திருக்கும்  மென்மையான தோள்களை உடையவள். பாசி படிந்த குளத்தில் கை வைத்தால் அந்த பாசி நீங்குவது போல உன் கை பட்டால்தான் இந்த பசலை நிறம் நீங்கும் போலிருக்கிறது . ஒன்றோடொன்று சண்டை போடும் கயல் மீன்களை போல அழகான கண்களை கொண்ட இவள் தூக்கத்தையே அடியோடு மறந்தாள்.

அன்பினால் உன் மேல் இருக்கும் மதிப்பும் ஆசையும் மேலும் மேலும் பெருகி கொண்டே போகிறது.

திருமணம் ஆகவில்லையே என்ற வருத்தமா! உன்  ஆசியும் துணையும் அருளும் முழமையாக கிடைக்க வேண்டும் என்ற ஆசையா!  நீ இவளுடன் பேச வேண்டும் என்ற ஆசையா! உன்னை அடைய வேண்டும் என்ற ஏக்கமா! இந்த அழகிய பெண்ணுக்கு உண்டான நோய் எது! என்று சரியாக தெரியவில்லை.

மின்னல் போல மெலிசா வளைஞ்சி நெளிச்சு இருக்கும் அழகான இடை சுருங்க அந்த சுருக்கம் அப்படியே மார்பின் மேலே ஏறி வீங்கிய அழகு முலைகளை கொண்ட இவளுக்கு அம்மா கல்யாணம் செய்து வைப்பாங்க! அப்ப செய்வாரு! சொந்தகாரங்க செய்வாங்க! நமக்கென்ன என்று இருந்தாயோ? அப்படியானால் நீ பரமபதத்தில் இருந்து வந்து திருவிடந்தையில் வசிப்பது எதற்கு? இப்படியே  போனால் இவளுக்கு என்ன ஆகுமோ? உன் உள்ளத்தில் இவளுக்கு என்ன செய்வதாக நினைத்து கொண்டு இருக்கிறாய்! திருஇடவெந்தை எந்தை பிரானே!

1117

அன்னமும் மீனும் ஆமையும் அரியும் ஆய* எம் மாயனே! அருளாய்* என்னும் 

இன் தொண்டர்க்கு இன் அருள் புரியும்* இடவெந்தை எந்தை பிரானை* 

மன்னு மா மாட மங்கையர் தலைவன்* மானவேல் கலியன் வாய் ஒலிகள்* 

பன்னிய பனுவல் பாடுவார்* நாளும் பழவினை பற்று அறுப்பாரே* 2.7.10 


அன்னமும் மீனும் ஆமையும் அரியும் ஆய - ஹம்சமாய், மட்சமாய், கூர்மமாய், நரசிம்மாய் அவதரித்த
எம் மாயனே! அருளாய் என்னும் - எம் மாயனே! அருளாய் என்னும்

இன் தொண்டர்க்கு இன் அருள் புரியும் - இனிய தொண்டர்க்கு இனிய அருள் புரியும் 

இடவெந்தை எந்தை பிரானை - திருஇடவெந்தை என் தந்தையாகிய பெருமாளை  

மன்னு மா மாட மங்கையர் தலைவன் - சிறந்த பெரிய மாடங்கள் உள்ள திருமங்கை நாட்டு தலைவன் 

மானவேல் கலியன் வாய் ஒலிகள்  - சிறந்த வேலை கையில் கொண்டுள்ள கலியன் வாயில் ஓசையோடு 

பன்னிய பனுவல் பாடுவார் - கூறிய பாசுரத்தை பாடுவார் 

நாளும் பழவினை பற்று அறுப்பாரே - எந்நாளும் பழைய தீய வினைகளை வேரோடு அறுப்பாரே !

விளக்கம்:-

ஹம்சமாய்,மட்சமும்,கூர்மமும், நரசிம்மமாகவும் அவதரித்த எம் பெருமாளே! அருளாய் என்று வேண்டும் இனிய தொண்டர்களுக்கு இனிய அருள் புரியும் திருஇடவெந்தையில் வசிக்கும் என் தந்தையாகிய பெருமாளை, சிறந்த அழகிய பெரிய மாடங்கள் உள்ள திருமங்கை நாட்டு தலைவன் கலிகன்றி வாயில் அழகிய இசையோடு கூறிய பாசுரத்தை பாடுவார் எந்நாளும் பழைய தீய செயல்களான வினைகளை வேரோடு அறுப்பாரே.

குறிப்பு: என்னடா!  திருமங்கை ஆழ்வார் இப்பெண்ணுக்கு என்ன செய்வதாக நினைத்திருந்தாய்? என்று மேலே 9 பாசுரங்களில் கேட்டு கொண்டிருக்க, பெருமாள் பதிலே சொல்லாமல் இருந்தாரே!! என்று நினைகிறீர்களா! இதோ 10-வது பாசுரத்தில் இனிய தொண்டர்களுக்கு இனிய அருள் புரியும் திருஇடவெந்தையில் வசிக்கும் என் தந்தையாகிய பெருமாளை என்று சொன்னாரே! அப்படியானால் பெருமாள் பயப்படாதே! வருத்தம் கொள்ளாதே! யாம் அருள் புரிந்தோம் என்று அருளியதால் இப்படி பாடியிருக்கிறார் என்று தானே அர்த்தம்! என்ன புரிஞ்சுதோ! 

                                                            நித்ய கல்யாணப் பெருமாள்


மூலவர் : லட்சுமி வராகப்பெருமாள்

உற்சவர்: நித்ய கல்யாணப் பெருமாள்

அம்மன்/தாயார் : கோமளவல்லி தாயார்

மங்களாசாசனம்: திருமங்கை ஆழ்வார்:- 13 பாசுரம்



திருஇடவெந்தை திருத்தலம் அமைந்துள்ள இடம்:-

INDIA – TAMILNADU - சென்னையிலிருந்து 42KM தொலைவில் உள்ளது . மகாபலிபுரம் போற வழியால் அதாவது ECR ரோட்டுல இருக்கு. திருவிடந்தை என்று கேட்டாலே சொல்வாங்க. 

திரு இடவெந்தை எந்தை பிரான் திருவடிகளே சரணம்!
திரு இடவெந்தை எந்தை பிரான் மலர் பாதங்களுக்கு சமர்ப்பணம்!

மகாபலிபுர பெருமாளை விரும்பி வழிபடுபவரை விரும்பு என் நல்ல நெஞ்சே!

மகாபலிபுர பெருமாளின் மோகினி அலங்காரம் (double click & see. superb!)

1098
நண்ணாத வாள் அவுணர்* இடைப் புக்கு* வானவரைப்
பெண் ஆகி * அமுது ஊட்டும் பெருமானார்* மருவினிய
தண் ஆர்ந்த கடல் மல்லைத்* தல சயனத்து உறைவாரை *
எண்ணாதே இருப்பாரை* இறைப் பொழுதும் எண்ணோமே* 2.6.1

நண்ணாத வாள் அவுணர் - பகைவரான கூரான பெரிய கத்தி வைத்திருக்கும் அசுரர்கள்
இடைப் புக்கு வானவரைப் - இடையில் புகுந்து வானவர்களுக்கு
பெண் ஆகி அமுது ஊட்டும் பெருமானார் - பெண் அமுது ஊட்டும் மோகினி பெருமாள்
மருவினிய தண் ஆர்ந்த கடல் மல்லைத் - இனிமையாக பொருந்திய குளிர்ச்சியான கடல் மல்லைத்
தல சயனத்து உறைவாரை - தல சயனத்தில் வசிப்பவரை
எண்ணாதே இருப்பாரை - மனதில் எண்ணாமல் இருப்பவரை
இறைப் பொழுதும் எண்ணோமே - ஒரு நொடி பொழுதும் எண்ணமாட்டோம்

விளக்கம்:-
பாற்கடலில் கடைந்து எடுத்த அமுதத்தை தீயவர்களான அசுரர்களுக்கும் கிடைக்காமல் இருக்க மற்றவர்களை தன் கவர்ச்சியால் மயக்க, அழகான மோகினி பெண்ணாய் மாறி தேவர்களுக்கு அமுதை ஊட்டும் பெருமாளும்,
இனிமையாக பொருந்திய குளிர்ச்சியான இடமான மகாபலிபுரம் கடல் மல்லைத் தல சயனத்தில் வசிப்பவருமான எம் செல்ல பெருமாளை எண்ணாமல் இருப்பவரை ஒரு நொடி பொழுது கூட எண்ண மாட்டோம்.

1099
பார் வண்ண மட மங்கை* பனி நல் மா மலர்க் கிழத்தி*
நீர் வண்ணன் மார்வத்தில்* இருக்கையை முன் நினைந்து அவன்
ஊர்* கார்வண்ண முது முந்நீர்க்* கடல் மல்லைத் தல சயனம்*
ஆர் எண்ணும் நெஞ்சு உடையார்* அவர் எம்மை ஆள்வாரே* 2.6.2

பார் வண்ண மட மங்கை - பூமியாக இருக்கும் இளைமையான பொண்ணும் (பூதேவி)
பனி நல் மா மலர்க் கிழத்தி - குளிர்ச்சியான நல்ல அழகான பெரிய தாமரை மலரில் அமர்ந்திருக்கும் தலைவியான மகாலட்சுமியும் (ஸ்ரீதேவி)
நீர் வண்ணன் மார்வத்தில் - நீர் வண்ணன் மார்பு இடத்தில்
இருக்கையை முன் நினைந்து அவன் ஊர் - இருக்கையில் முன் (அமர்ந்து அவனையே) நினைத்து (கொண்டிருப்பார்கள் அப்பேற்பட்ட) அவன் ஊர்
கார்வண்ண முது முந்நீர்க் - மேகம் போன்ற வண்ணம் கொண்ட பழமையான கடல் நீரின் (கரையில் உள்ள)
கடல் மல்லைத் தல சயனம் - (மகாபலிபுரம் என்ற) கடல் மல்லைத் தல சயனம் (பெருமாளை)
ஆர் எண்ணும் நெஞ்சு உடையார் - மேல் ஆசை வைத்து நினைக்கும் நெஞ்சை உடையவர்கள்
அவர் எம்மை ஆள்வாரே - அவர் எம்மை ஆள்வாரே

விளக்கம்:-
நாம் வசிக்கும் பூமியாக இருக்கும் நல்ல குணங்கள் கொண்ட இளமையான பெண்ணான பூமி தாயாரும், குளிர்ச்சியான இருக்கும் அழகான தாமரை மலர் மேல் அமர்ந்திருக்கும் தலைவி நம்ம மகாலட்சுமி என்கின்ற ஸ்ரீதேவியும்,

நீர் வண்ணனின் மார்பில் அதாவது நீர் எதில் ஊற்றுகிறோமோ அந்த வடிவத்தை பெரும். இறைவனும் அதுபோலவே வடிவில்லாதவன். தான் விரும்பும் வடிவத்தில் இருக்கிறான். அதனால் அவனுக்கு நீர் வண்ணன் என்ற பெயர் . So நீர் வண்ணனின் இட பக்கத்தில் பூதேவியும், வலப்பக்கத்தில் ஸ்ரீதேவியும் மார்பின் முன் வசித்து கொண்டு எம்பெருமானையே நினைத்து கொண்டிருப்பர்.

அப்பேற்பட்ட அவன் ஊர் இருக்குமிடம், மேகம் போல நீல கலர்ல இருக்கும் பழமையான கடல் இருக்கும் மகாபலிபுரம் கடல் மலை தல சயனம். எம்பெருமான் மேல் ஆசை வைத்து நினைக்கும் நெஞ்சம் உடையவர்கள் எவராக இருந்தாலும் அவர்கள் எம்மை ஆள்வாரே!

1100
ஏனத்தின் உருவு ஆகி* நில மங்கை எழில் கொண்டான்*
வானத்தில் அவர் முறையால்* மகிழ்ந்து ஏத்தி வலம் கொள்ள*
கானத்தின் கடல் மல்லைத்* தல சயனத்து உறைகின்ற*
ஞானத்தின் ஒளி உருவை* நினைவார் என் நாயகரே*2.6.3


ஏனத்தின் உருவு ஆகி - பன்றியின் உருவம் ஆகி
நில மங்கை எழில் கொண்டான் - பூமி தாயார் அழகு (மாறாமல் கடலில் இருந்து தூக்கி) வந்தான்
வானத்தில் அவர் முறையால் - வானத்தில் தேவர்கள் அவர்கள் முறைப்படி
மகிழ்ந்து ஏத்தி வலம் கொள்ள - மகிழ்ந்து வழிபட்டு சுற்றி வருவதற்கு வசதியாக
கானத்தின் கடல் மல்லைத் தல சயனத்து உறைகின்ற - காட்டில் உள்ள கடல் மல்லைத் தல சயனத்தில் வசிக்கின்ற
ஞானத்தின் ஒளி உருவை - அனைத்தும் அறிந்த ஒளி கொண்ட உருவத்துடன் (இருக்கும் பெருமாளை)
நினைவார் என் நாயகரே - நினைப்பவர் என் தலைவரே!

விளக்கம்:-
பல யுகங்களுக்கு முன்பு இரணியனின் தம்பி இரணியாக்சன் என்ற அரக்கன் பூமியை அலேக்கா தூக்கி கொண்டு கடலுக்கு அடியில் வைத்து விட்டதால் பூமியை காப்பாற்ற வளைந்த கோரை பற்களுடன் பன்றி வடிவம் எடுத்து பூமி தாயாரின் அழகு மாறாமல் கொம்பினால் குத்தி பெயர்த்து எடுத்து வந்தவனை,

வானத்தில் உள்ளவர்கள் அவர்களின் பழக்க வழக்கத்தின் படி மகிழ்ச்சியுடன்
போற்றி வழிபட்டு பிரதக்ஷணம் செய்வதற்கு வசதியாக காட்டின் நடுவே உள்ள
மகாபலிபுரம் கடல் மல்லைத் தல சயனத்தில் வசிக்கும், அனைத்தும் அறிந்த ஒளி உருவத்துடன் உள்ளவரை நினைப்பவர் என் தலைவரே!





1101
விண்டாரை வென்று ஆவி* விலங்கு உண்ண மெல்லியலார்*
கொண்டாடும் மல் அகலம்* அழல் ஏற வெம் சமத்துக்*
கண்டாரை கடல் மல்லைத்* தல சயனத்து உறைவாரைக்
கொண்டாடும் நெஞ்சு உடையார்* அவர் எங்கள் குல தெய்வமே* 2.6.4

விண்டாரை வென்று ஆவி - பகைவர்களை வென்று அவர்களின் உடலை
விலங்கு உண்ண மெல்லியலார் - விலங்குகள் உண்ண (செய்தவனும்) மென்மையான பெண்கள்
கொண்டாடும் மல் அகலம் - கொண்டாடும் வலிமை வாய்ந்த மார்பை
அழல் ஏற வெம் சமத்துக் கண்டாரை - நெருப்பு திண்ணும்படி வலிமையான போரில் பார்த்து கொண்டிருந்தவரை
கடல் மல்லைத் தல சயனத்து உறைவாரைக் - கடல் மல்லைத் தல சயனத்தில் வசிப்பவரை
கொண்டாடும் நெஞ்சு உடையார் - கொண்டாடும் நெஞ்சம் உடையவர் எவராக இருந்தாலும்
அவர் எங்கள் குல தெய்வமே - அவர் எங்கள் குல தெய்வமே

விளக்கம்:-
பகைவர்களான பொல்லாத அரக்கர்களை வென்று, அவர்களின் உடலை நாய், நரி போன்ற விலங்குகள் உண்ணும்படி அவர்களை அழித்தவனை,

மென்மையான நச்சுன்னு நெளிவு சுளிவு கொண்ட அழகான பொண்ணுங்க அனுபவித்து போற்றி கொண்டாடும் வலிமை வாய்ந்த மார்பை உடைய அரக்கர்களை, நெருப்பு உண்ணும்படி அழிப்பதற்காக, முன்பு நடந்த பயங்கரமான போரில் அரக்கர்களை கண்டு கொண்டு அந்த பாவிகளை அடியோடு அழித்தவரை,

மகாபலிபுரம் கடல் மல்லைத் தல சயனத்தில் வசிப்பவரை, மகிழ்ந்து போற்றி கொண்டாடும் நெஞ்சு உடையவர்கள் எவராக இருந்தாலும் அவர் எங்கள் குல தெய்வமே

1102
பிச்சச் சிறு பீலிச்* சமண் குண்டர் முதலாயோர்*
விச்சைக்கு இறை என்னும்* அவ் இறையைப் பணியாதே*
கச்சிக் கிடந்தவன் ஊர்* கடல் மல்லைத் தல சயனம்*
நச்சித் தொழுவாரை* நச்சு என் தன் நல் நெஞ்சே*2.6.5

பிச்சச் சிறு பீலிச் - மயிலின் சிறு இறகை (கொண்டு இருக்கும்)
சமண் குண்டர் முதலாயோர் - மாற்றி படிக்க - குண்டர் சமண் அதாவது கீழ்தரமான சமணர் முதலானோர்
விச்சைக்கு இறை என்னும் - கல்விக்கு இறைவன் என்னும் (அவர்கள் வணங்கும்)
அவ் இறையைப் பணியாதே - அந்த இறைவனை பணியாதே
கச்சிக் கிடந்தவன் ஊர் - காஞ்சிபுரத்தில் படுத்து கொண்டு தரிசனம் தருபவன் ஊர்
கடல் மல்லைத் தல சயனம் - கடல் மல்லைத் தல சயனம் (அங்கு எம்பெருமானை)
நச்சித் தொழுவாரை - விரும்பி வழிபடுபவரை
நச்சு என் தன் நல் நெஞ்சே - விரும்புவாய் என்னுடைய நல்ல நெஞ்சமே

விளக்கம்:-
மயில் இறகால் செய்த குடையையும், சின்னதா ஒரு மயில் இறகையும் கையில் வைத்து கொண்டு ஒட்டு துணி இல்லாமல் நிர்வாணமாக ரோட்டில் திரியும் கீழ்தரமான சமணர் முதலானோர், கல்விக்கு கடவுள் என்று வணங்கும் அந்த தெய்வத்தை பணியாமல்,

காஞ்சிபுரத்தில் சயன கோலத்தில் அழகாக காட்சி தரும் யதோத்தகாரி பெருமாளின் ஊர், மகாபலிபுரம் கடல் மலை தல சயனம் என்று விரும்பி வழிபடுபவரை விரும்புவாய் என்னுடைய நல்ல நெஞ்சமே.



1103
புலன் கொள் நிதிக் குவையோடு* புழைக் கை மா களிற்று இனமும்*
நலம் கொள் நவமணிக் குவையும்* சுமந்து எங்கும் நான்று ஒசிந்து*
கலங்கள் இயங்கும் மல்லைக்* கடல் மல்லைத் தல சயனம்*
வலங்கொள் மனத்தார் அவரை* வலங்கொள் என் மட நெஞ்சே*2.6.6

புலன் கொள் நிதிக் குவையோடு - ஐம்புலன்களை கொள்ளை கொள்ளும் நல்ல நல்ல பொருள்களின் குவியலோடு
புழைக் கை மா களிற்று இனமும் - துளை கொண்ட தும்பிக்கையுடைய பெரிய யானை கூட்டமும்
நலம் கொள் நவமணிக் குவையும் - நல்லா (மனசை) கொள்ளை கொள்ளும் நவரத்தின குவியலையும்
சுமந்து எங்கும் நான்று ஒசிந்து - சுமந்து தொங்கி தளர்ந்து எங்கும்
கலங்கள் இயங்கும் மல்லைக் - கப்பல்கள் இயங்கும் பெருமை மிகுந்த
கடல் மல்லைத் தல சயனம் - கடல் மல்லைத் தல சயனம் (பெருமாளை)
வலங்கொள் மனத்தார் அவரை - சுற்றி வரும் மனம் உடைய அவரை
வலங்கொள் என் மட நெஞ்சே - சுற்றி வருவாய் என் அறிவில்லாத நெஞ்சமே


விளக்கம்:-
நம்மை போல மனுசங்களுக்கு ஆசையை தூண்டும் பொன் குவியல்களையும், முனையில் ஓட்டை கொண்ட தும்பிக்கையுடைய பெருசு பெருசா இருக்கும்
யானை கூட்டத்தையும், நல்லா மனசை கொள்ளை கொள்ளும் ஜொலிக்கும் நவரத்தின குவியல்களையும் ஏற்றி கொண்டு, சுமையை சுமக்க முடியாமல் தொங்கி தளர்ந்து செல்லும் கப்பல்கள் கடலில் அழகா எங்கும் சுற்றி கொண்டிருக்கும்,

இப்படி எல்லா சிறப்பும் வசதிகளும் பெற்றுள்ள பெருமை வாய்ந்த மகாபலிபுரம், கடல் மல்லைத் தல சயன பெருமாளை விரும்பி சுற்றி வரும் மனதை உடையவர்களை சுற்றி வாருவாய்! என் அறிவிலாத மட நெஞ்சே!

1104
பஞ்சிச் சிறு கூழை* உரு ஆகி மருவாத*
வஞ்சப் பெண் நஞ்சு உண்ட* அண்ணல் முன் நண்ணாத*
கஞ்சைக் கடந்தவன் ஊர்* கடல் மல்லைத் தல சயனம்*
நெஞ்சில் தொழுவாரைத்* தொழுவாய் என் தூய் நெஞ்சே*2.6.7

பஞ்சிச் சிறு கூழை - பஞ்சு போல சிறு முடி கொண்ட
உரு ஆகி மருவாத - உருவம் ஆகி இரக்கமில்லாத
வஞ்சப் பெண் நஞ்சு உண்ட - சூழ்ச்சி பெண் விஷம் உண்ட
அண்ணல் முன் நண்ணாத - இறைவன் முன்பு பகைவனான
கஞ்சைக் கடந்தவன் ஊர் - கம்சனை அழித்த அவன் ஊர்
கடல் மல்லைத் தல சயனம் - கடல் மல்லைத் தல சயனம்
நெஞ்சில் தொழுவாரைத் - நெஞ்சில் வழிபடுபவரை
தொழுவாய் என் தூய் நெஞ்சே - வழிபடுவாய் என் தூய நெஞ்சே

விளக்கம்:-
பஞ்சு போல மெத்து மெத்துனு கைகளிலும் உடலிலும் அழகா சிறு முடிகளை கொண்ட யசோதை அம்மாவின் உருவமாக தன்னை மாற்றி கொண்டு இரக்கமே இல்லாத சூழ்ச்சிக்கார அரக்கியான பூதனை பொண்ணு முலையில் தடவியிருந்த விஷத்தை உண்ட என் அன்பு அண்ணல்,
முன்பு விரோதியான கொடூரமான கம்சனை போரில் வெற்றி பெற்று அழித்தான். அவன் ஊர் மகாபலிபுரம் கடல் மல்லைத் தல சயனம். அங்கு அழகாக தரையில் படுத்து கொண்டு இருக்கும் பெருமாளை ஆசையோடு வழிபடுபவரை வழிபடுவாய் என் தூய நெஞ்சே!

திருமங்கை ஆழ்வார் மற்றும் அவர் மனைவி குமுதவல்லி

1105
செழு நீர் மலர்க் கமலம்* திரை உந்த வன் பகட்டால்*
உழு நீர் வயல் உழவர் உழ* பின் முன் பிழைத்து எழுந்த*
கழு நீர் கடி கமழும்* கடல் மல்லைத் தல சயனம்*
தொழு நீர் மனத்து அவரைத்* தொழுவாய் என் தூய் நெஞ்சே* 2.6.8

செழு நீர் மலர்க் கமலம் - செழு நீர் கமலம் மலர்க் - செழுமையான நீரில் தாமரை மலர்
திரை உந்த வன் பகட்டால் - வன் பகட்டால் திரை உந்த - வலிமையான எருதுகளால் அலை தள்ளப்பட
உழு நீர் வயல் உழவர் உழ - உழுவதற்காகவே ஊற்ற பட்ட நீர் சூழ்ந்த கழனியில் உழவர் உழ
பின் முன் பிழைத்து எழுந்த - முன்னும் பின்னும் தப்பித்து வந்த
கழு நீர் கடி கமழும் - அழகிய நீரில் வாசம் வீசும்
கடல் மல்லைத் தல சயனம் - கடல் மல்லைத் தல சயனம்
தொழு நீர் மனத்து அவரைத் - இயற்கையாகவே வணங்கும் மனசு உடையவரை
தொழுவாய் என் தூய் நெஞ்சே - வணங்குவாய் என் தூய நெஞ்சே

விளக்கம்:-
கழனியில் உழவர்கள் மாடுகளை வைத்து கொண்டு உழும்போது ஏற்பட்ட அலைகளால்,
முன்னும் பின்னும் அடித்து செல்லபட்டு தப்பித்து தரை மேலே எழுந்த தாமரை மலர்களின்
வாசம் சூழ்ந்த அழகான மகாபலிபுரம் கடல் மல்லைத் தல சயன கோவிலில் பூமியின் மேலே
படுத்து கொண்டிருக்கும் பெருமாளை ஆசையோடு வணங்கும் மனது உடையவரை
வணங்குவாய் என் தூய நெஞ்சே


1106
பிணங்கள் இடு காடு அதனுள்* நடமாடு பிஞ்ஞகனோடு*
இணங்கு திருச் சக்கரத்து* எம் பெருமானார்க்கு இடம்* விசும்பில்
கணங்கள் இயங்கும் மல்லைக்* கடல் மல்லைத் தல சயனம்*
வணங்கும் மனத்தார் அவரை* வணங்கு என் தன் மட நெஞ்சே*2.6.9

பிணங்கள் இடு காடு அதனுள் - பிணங்களை எரிக்கும் சுடுகாடு அதற்குள்
நடமாடு பிஞ்ஞகனோடு - நடனமாடும் ஈசனோடு
இணங்கு திருச் சக்கரத்து - சேர்ந்திருக்கிற திருசக்கரங்களை உடைய
எம் பெருமானார்க்கு இடம் - என்னுடைய பெருமானுக்கு இடம்
விசும்பில் கணங்கள் இயங்கும் மல்லைக் - வானத்தில் இருக்கும் தேவர்கள் கூட்டதோடு வந்து வழிபடும் பெருமையுடைய
கடல் மல்லைத் தல சயனம் - மகாபலிபுரம் கடல் மல்லைத் தல சயனம்
வணங்கும் மனத்தார் அவரை - வணங்கும் மனமுடைய அவரை
வணங்கு என் தன் மட நெஞ்சே - வணங்கு என்னுடைய அறிவற்ற நெஞ்சே

விளக்கம்:-
பிணங்களை எரிக்கும் சுடுகாட்டில் அழகாக நடனமாடும் ஈசனுக்கு, அன்போடு தன்னுடைய வலபக்கத்தில் இடம்கொடுத்து ஈசனோடு சேர்ந்து இருக்கும் திருசக்கரத்தை கையில் கொண்டுள்ள எம்பெருமானுக்கு இடம்,

வானத்தில் தேவர்கள் கூட்டதோடு வழிபடும் பெருமை வாய்ந்த, மகாபலிபுரம் கடல் மல்லைத் தல சயனத்தில் தரையில் படுத்து கொண்டு அழகாக காட்சி தரும் பெருமாளை, அன்போடு வணங்கும் மனது உடையவரை வணங்கு என்னுடைய அறிவற்ற நெஞ்சே

1107
கடி கமழும் நெடு மறுகின்* கடல் மல்லைத் தல சயனத்து*
அடிகள் அடியே நினையும்* அடியவர்கள் தம் அடியான்*
வடி கொள் நெடு வேல் வலவன்* கலிகன்றி ஒலி வல்லார்*
முடி கொள் நெடு மன்னவர் தம்* முதல்வர் முதல் ஆவாரே*2.6.10

கடி கமழும் நெடு மறுகின் - வாசனை வீசும் பெரிய தெருவில்
கடல் மல்லைத் தல சயனத்து - கடல் மல்லைத் தல சயனத்து
அடிகள் அடியே நினையும் - பெருமாளின் திருவடியே நினைக்கும்
அடியவர்கள் தம் அடியான் - அடியவர்களுக்கும் அடியவன்
வடி கொள் நெடு வேல் வலவன் - கூர்மையான பெரிய வேல் கொண்டு போரிடுவதில் வல்லவன்
கலிகன்றி ஒலி வல்லார் - திருமங்கை ஆழ்வார் பாடியதை சொல்ல வல்லவர்
முடி கொள் நெடு மன்னவர் தம் - கிரீடத்தை உடைய பெரிய மன்னருக்கு முதல்வர் முதல் ஆவாரே. - முதல்வராக இருப்பவர்க்கும் முதல்வராக ஆவார்கள்

விளக்கம்:-
மகாபலிபுரம் பீச்சு பக்கத்துல கம கமன்னு வாசனை வீசும் பெரிய தெருவில் கடல் மலை தல சயனத்தில் படுத்து கொண்டிருக்கும் பெருமாளின் திருவடிகளையே நினைக்கும் அடியவர்களுக்கும் அடியவனான,
கையில் கூர்மையான வேல் கொண்டு போரிடுவதில் வல்லவனுமான திருமங்கை ஆழ்வான் பாடியதை ஆசையோடு சொல்ல வல்லவர், தலையில் பெரிய கிரீடம் வைத்து கொண்டிருக்கும் மன்னருக்கு முதல்வராக இருப்பவருக்கும் முதல்வர் ஆவீர்கள்!

திருமங்கை ஆழ்வார்

திருகடல் மல்லைசயன திருத்தலம் அமைந்துள்ள இடம்:-

INDIA – TAMILNADU - சென்னையிலிருந்து 64KM தொலைவில் உள்ளது . மகாபலிபுரம் பீச்சுக்கு போய் இருக்கீங்களா! அதுக்கு பக்கதுலதாங்க இருக்கு! நம்ம  ஸ்தல சயன பெருமாள் ஜம்முனு பூமியின் மேலே அதாவது தரையில அழகா படுத்துக்கொண்டு காட்சி தராரு! எவ்ளோ அழுகு தெரியுமா SO NICE!

மூலவர் : ஸ்தல சயன பெருமாள்
உற்சவர்: உலகுய்ய நின்றான்
அம்மன்/தாயார் : நிலமங்கை தாயார்


மங்களாசாசனம்: திருமங்கை ஆழ்வார்:- 26 பாசுரம்
பூதத்தாழ்வார் - 1 பாசுரம்







திருகடல் மல்லைத் ஸ்தல சயன பெருமாள் திருவடிகளே சரணம்!
திருகடல் மல்லைத் ஸ்தல சயன பெருமாளின் திருவடிகளுக்கு சமர்ப்பணம்!

நினைப்பவர்களின் உள்ளத்தில் வசிப்பவனை காணாது திரிந்து கொண்டிருந்தேன் இன்று கண்டு கொண்டேன் மகாபலிபுரம் கடல் மல்லைத் தல சயனத்தே!

ஸ்தல சயன பெருமாள்

1088
பார் ஆயது உண்டு உமிழ்ந்த பவளத் தூணைப்* படு கடலில் அமுதத்தைப் பரி வாய் கீண்ட
சீரானை* எம்மானை தொண்டர் தங்கள் சிந்தையுள்ளே* முளைத்து எழுந்த தீம் கரும்பினை*
போர் ஆனைக் கொம்பு ஒசித்த போர் ஏற்றினைப்* புணர் மருதம் இற நடந்த பொன் குன்றினை*
கார் ஆனை இடர் கடிந்த கற்பகத்தைக்* கண்டது நான் கடல் மல்லைத் தல சயனத்தே* 2.5.1

பார் ஆயது உண்டு உமிழ்ந்த பவளத் தூணைப் - உலகம் ஆகியவற்றை உண்டு துப்பிய பவள தூண் போன்றவனை
படு கடலில் அமுதத்தைப் - கடலில் படுத்து கொண்டிருக்கும் அமுதத்தைப்
பரி வாய் கீண்ட சீரானை - குதிரை வாயை பிளந்த செல்வம் உடையவனை
எம்மானை தொண்டர் தங்கள் சிந்தையுள்ளே - எம் இறைவனை தொண்டர்கள் தங்கள் உள்ளத்துள்ளே
முளைத்து எழுந்த தீம் கரும்பினை - தோன்றி எழுந்த இனிப்பான கரும்பினை
போர் ஆனைக் கொம்பு ஒசித்த போர் ஏற்றினைப்- போர் யானை கொம்பை ஒடித்த போர் சிங்கத்தை
புணர் மருதம் இற நடந்த- ஒன்றோடொன்று இணைந்த மருத மரங்களை விழும்படி நடந்த
பொன் குன்றினை - தங்க குன்றினை போன்றவனை
கார் ஆனை இடர் கடிந்த கற்பகத்தைக் - அழகான யானையின் துன்பத்தை அழித்த கற்பக மரம் போன்றவனை
கண்டது நான் கடல் மல்லைத் தல சயனத்தே - கண்டது நான் கடல் மல்லை தல சயனத்தே

விளக்கம்:-
முன்னாடி உலகம் முழுதும் பெரிய அழிவு ஏற்பட்ட போது உலகம் முழுவதையும் உண்டு தன்னோட வயிற்றில் வைத்து பாதுகாத்து, பின்பு வெளியில் துப்பிய செக்க செவேல்னு உள்ள பவள தூணை போன்றவனை,

பாற்கடலில் படுத்து கொண்டிருக்கும் அமுதத்தை, கம்சன் அனுப்பிய கேசி என்ற அரக்கன் மிக பெரிய குதிரை வடிவில் கண்ணனை கொல்ல வந்ததை அறிந்து, தன்னோட கையை குதிரை வாயில் வைத்து, வாயை பொளந்த பெருமை உடையவனை, என்னோட இறைவனை,
தொண்டர்களின் உள்ளத்துள்ளே தோன்றி எழுந்த இனிப்பான கரும்பினை, முன்பு கம்சன் கண்ணனை கொல்ல அனுப்பிய போர் யானையின் கொம்பை ஒடித்த போர் சிங்கத்தை, முன்பு மரமாகும் படி நாரதரால் சாபம் பெற்ற இருவரின் சாபம் நீக்க, கண்ணன் குழந்தையாக இருக்கும்போது வெண்ணை திருடி உண்டாயே! என்று யசோதை அம்மா கண்ணனை உரலில் கட்டி விட, உரலை இழுத்து கொண்டு ஒன்றோடொன்று இணைந்த அந்த இரு மருத மரங்களுக்கு இடையில் தவழ்ந்து சென்று ஒடித்த தங்க மலை போன்று அழகானவனை,
முன்பு அழகான யானை ஒன்று பக்தியுடன் பெருமாளுக்கு பூ எடுக்க குளத்தில் இறங்கிய போது முதலை, யானை காலை லபக்குனு கடித்தவுடன், ஆதி மூலமே! என்று பிளிற, உடனே கருட வாகனத்தில் வந்து யானையின் துன்பத்தை போக்கிய கேட்க கேட்க கொடுக்கும் கற்பக மரம் போன்றவனை, கண்டது நான் (மகாபலிபுரம்) கடல் மல்லை தல சயனத்திலே!

1089
பூண்டு அவத்தம் பிறர்க்கு அடைந்து தொண்டு பட்டுப்* பொய்நூலை மெய்ந்நூல் என்று என்றும் ஓதி
மாண்டு* அவத்தம் போகாதே வம்மின்* எந்தை என் வணங்கப்படுவானை* கணங்கள் ஏத்தும்
நீண்ட வத்தைக் கருமுகிலை எம்மான் தன்னை* நின்றவூர் நித்திலத்தைத் தொத்து ஆர் சோலை*
காண்டவத்தைக் கனல் எரிவாய்ப் பெய்வித்தானைக்* கண்டது நான் கடல் மல்லைத் தலசயனத்தே* 2.5.2

பூண்டு அவத்தம் - (மாற்றி படிக்க) பூண்டு அவத்தம் - பயனற்றவைகளை ஏற்று கொண்டு
பிறர்க்கு அடைந்து தொண்டு பட்டுப் - பிறரிடம் தஞ்சம் அடைந்து தொண்டு செய்து
பொய்நூலை மெய்ந்நூல் என்று - பொய்நூலை உண்மையான நூல் என்று
என்றும் ஓதி மாண்டு அவத்தம் போகாதே - எப்போதும் படித்து கடைசியில் இறந்து வீணா போகாதே
வம்மின் எந்தை என் வணங்கப்படுவானை - வாருங்கள்! என் தந்தை என்னால் வணங்கப்படுபவனை
கணங்கள் ஏத்தும் நீண்ட வத்தைக் - கூட்டங்கள் போற்றி வழிபடும் நீண்ட கைகளை உடைய
கருமுகிலை எம்மான் தன்னை - கரிய மேகமான எம் இறைவனான அவனை
நின்றவூர் நித்திலத்தைத் - திருநின்றவூர் திருத்தலத்தில் உள்ள முத்தை
தொத்து ஆர் சோலை காண்டவத்தைக் - கொத்து கொத்தாக உள்ள மரம் செடிகள் பூக்கள் கொண்ட சோலையான காண்டவனத்தை (எரிக்க )
கனல் எரிவாய்ப் பெய்வித்தானைக் - கடுமையான சூடான நெருப்பை அக்னி வாயில் பெய்வித்தவனை
கண்டது நான் கடல் மல்லைத் தலசயனத்தே - கண்டது நான் கடல் மல்லை தல சயனத்திலே



விளக்கம்:-
பயனற்றவைகளை ஏற்று கொண்டு, பிறரிடம் தஞ்சம் அடைந்து அவர்களுக்கு சேவைகள் செய்து, ஏதேதோ பொய்யான புத்தகங்களை எல்லாம் உண்மையான புத்தகங்கள் என்று எண்ணி எந்நேரமும் அவற்றை வீணாக படித்து கொண்டு காலத்தை வீணாக்கி கடைசியில் இறந்து பயனற்று போகாதீர்கள்.

வாருங்கள்! என் தந்தையானவனும், என்னை போன்றவர்களால் வணங்கப்படுபவனும், அறிவுடையவர்கள் கூட்டமாக போற்றி வழிபடுபவனை

கேட்பவர்களுக்கு தேடி சென்று கொடுக்கும் நீண்ட கைகளை உடைய கருமையான மேகம் போன்றவனை,
என்னோட இறைவனானவனை, திருநின்றவூர் திருதலத்தில் வசிக்கும் என் செல்ல முத்தை,

சுவேதகி என்ற மன்னன் தொடர்ந்து ஆண்டுகள் யாகம் நடத்த அந்த யாக தீயில் விடப்பட்ட நெய்யை அக்னி தொடர்ந்து உண்ண, யாகம் முடிந்தவுடன் அக்னிக்கு அகோர பசி எடுக்க பிரம்மன் இந்திரனின் காண்டவனே காடே உனது பசிக்கு சரி! என்று கூற, அக்னியை எரிக்க விடாமல் இந்திரன் மழையை பெய்விக்க, கண்ணனிடம் அக்னி சரணடைந்து தனக்கு உதவுமாறு கூற , அதன் படியே கொத்து கொத்தாக மரம் செடி பூக்கள் நிறைந்த சோலையான காண்டாவனத்தை எரிக்க, நல்ல சூடான நெருப்பை அக்னியில் வாயில் மழை போல பெய்வித்தவனை, கண்டது நான் (மகாபலிபுரம்) கடல் மல்லை தல சயனத்திலே!


நின்றவூர் நித்தலத்தை என்று திருமங்கை ஆழ்வார் சொன்ன திருநின்றவூர் பக்தவத்சல பெருமாள் கோவில்

1090
உடம்பு உருவில் மூன்று ஒன்றாய் மூர்த்தி வேறாய்* உலகு உய்ய நின்றானை* அன்று பேய்ச்சி
விடம் பருகு வித்தகனைக்* கன்று மேய்த்து விளையாட வல்லானை வரை மீ கானில்*
தடம் பருகு கருமுகிலைத் தஞ்சைக் கோயில்* தவநெறிக்கு ஓர் பெரு நெறியை வையம் காக்கும்*
கடும் பரி மேல் கற்கியை நான் கண்டு கொண்டேன்* கடி பொழில் சூழ் கடல் மல்லைத் தல சயனத்தே* 2.5.3


உடம்பு உருவில் மூன்று ஒன்றாய் - உடம்பு உருவில் (பிரம்மன், சிவன், இந்திரன்) மூவரும் சேர்ந்து ஒன்றாய் (இருப்பவன் ஆனால் அவனே)
மூர்த்தி வேறாய் உலகு உய்ய நின்றானை - தெய்வம் வேறு வேறாய் உலகம் வாழ நின்றவனை
அன்று பேய்ச்சி விடம் பருகு வித்தகனைக் - அன்று பூதனை பேயின் விஷம் உண்ட மாய காரனை
கன்று மேய்த்து விளையாட வல்லானை - பசு குட்டிகளை மேய்த்து விளையாட திறமையானவனை
வரை மீ கானில் - மலை மேலுள்ள காட்டில்
தடம் பருகு கருமுகிலைத் - குளத்தில் (பசு குட்டிகள் நீர்) பருக (சொல்லி கொடுக்கும்) கருப்பான மேகம் போன்றவனை
தஞ்சைக் கோயில் - தஞ்சாவூர் மாமணி கோவில்
தவநெறிக்கு ஓர் பெரு நெறியை - (இறைவனை அதாவது அவனை அடைய) மேற்கொள்ளும் தியான முறைக்கு ஒரு பெரிய வழிகாட்டியை
வையம் காக்கும் கடும் பரி மேல் கற்கியை - உலகம் காக்கும் (பொருட்டு) வேகமாக ஓடும் குதிரை மேல் (வரும்) கல்கியை
நான் கண்டு கொண்டேன் - நான் கண்டு கொண்டேன்
கடி பொழில் சூழ் கடல் மல்லைத் தல சயனத்தே - மணம் வீசும் பூக்கள் செடி கொடிகள் மரங்கள் சூழ்ந்துள்ள கடல் மல்லை தல சயத்திலே!

விளக்கம்:-
பிரம்மன்,சிவன், இந்திரன் என்று மூவரும் ஒரே உடம்பு உருவத்தில் உள்ளவனை, ஆனால் படைத்தல், அழித்தல், காத்தல் இவைகளை செய்வதற்காக வேறு வேறு தெய்வங்களாக நின்றவனை,

முன்பு கம்சன் கண்ணனை கொல்ல அனுப்பிய பூதனை பேயின் விஷம் தடவிய முலையில் பாலை குடிப்பது போல விஷம் பருகி அவளை கொன்ற மாயக்காரனை, பசுக்களையும், பசு குட்டிகளையும் மேய்த்து விளையாட திறமையானவனை, மலை மேல் உள்ள காட்டில் பசு குட்டிகள் குளத்தில் நீர் குடிக்க பயப்படும் போது, தானே முதுகில் கையை கட்டி கொண்டு வாயால் நீர் குடிக்க கன்றுகளுக்கு சொல்லி கொடுத்த கருமையான மேகம் போன்றவனை,

தஞ்சாவூர் மாமணி கோவிலில் வசிப்பவனை, (இறைவனை அதாவது) அவனை அடைய மேற்கொள்ளும் தியான முறைக்கு அவனை பற்றுவதே சிறந்த வழி என்று தானே ஒரு பெரிய வழிகாட்டியாக இருப்பவனை,

உலகத்தை காக்கும் பொருட்டு வேகமாக ஓடும் குதிரை மேல் வரபோகும் கல்கியை நான் கண்டு கொண்டேன், நல்ல மணம் வீசும் சோலைகள் சூழ்ந்துள்ள (மகாபலிபுரம்) கடல் மல்லை தல சயனத்திலே!


Kalki perumal

1091
பேய்த் தாயை முலை உண்ட பிள்ளை தன்னைப்* பிணை மருப்பின் கருங்களிற்றைப் பிணை மான் நோக்கின்*
ஆய்த்தாயர் தயிர் வெண்ணை அமர்ந்த கோவை* அந்தணர் தம் அமுதத்தைக் குரவை முன்னே
கோத்தானை* குடம் ஆடு கூத்தன் தன்னைக்* கோகுலங்கள் தளராமல் குன்றம் ஏந்திக்
காத்தானை* எம்மானைக் கண்டு கொண்டேன்* கடி பொழில் சூழ் கடல் மல்லைத் தல சயனத்தே* 2.5.4

பேய்த் தாயை முலை உண்ட பிள்ளை தன்னைப் - பேய் தாயின் முலை உண்ட குழந்தையான அவனை
பிணை மருப்பின் கருங்களிற்றைப் - இரு தந்தம் கொண்ட கரிய ஆண் யானைகுட்டியை போன்றவனை
பிணை மான் நோக்கின் ஆய்த்தாயர் - பெண் மான் (போல அழகான) பார்வை உடைய அழகான அம்மா (யசோதை செய்த)
தயிர் வெண்ணை அமர்ந்த கோவை - தயிர், வெண்ணை (மேலே ஆசை) வைத்து (விரும்பி சாப்பிடும் கோவலனை
அந்தணர் தம் அமுதத்தைக் - ஒழுக்கமுடையவர்களான பிராமணர்களுக்கு அமுதத்தை போன்றவனை
குரவை முன்னே கோத்தானை - பெண்களோடு முன்பு கை கோர்த்து கூத்து ஆடியவனை
குடம் ஆடு கூத்தன் தன்னைக் - குடத்தை தலையில் வைத்து கொண்டு கூத்து ஆடியவனை
கோகுலங்கள் தளராமல் - (முன்பு இந்திரன் கடும் மழை பெயவித்தபோது) கோகுலங்கள் துன்ப படாமல்
குன்றம் ஏந்திக் காத்தானை - மலையை (கையில்) தூக்கி (அனைவரையும்) காப்பாற்றிய்வனை
எம்மானைக் கண்டு கொண்டேன் - என் இறைவனை கண்டு கொண்டேன்
கடி பொழில் சூழ் கடல் மல்லைத் தல சயனத்தே - மணம் வீசும் பூக்கள் செடி கொடிகள் மரங்கள் சூழ்ந்துள்ள கடல் மல்லை தல சயத்திலே

விளக்கம்:-
முன்பு கம்சன் குழந்தை கண்ணனை கொல்ல அனுப்பிய தாய் வடிவில் வந்த பூதனை பேயின் விஷம் தடவிய முலையை வாயில் வைத்து கொண்டு பால் குடிப்பது போல அவளது உயிரை உண்ட குழந்தையான அவனை, ஜோடியாக உள்ள தந்தங்களை கொண்ட துரு துரு என்று இருக்கும் இனிய ஆண் யானைகுட்டி போன்றவனை,

பெண் மான் கண்களை போல அழகான பார்வை கொண்ட பசு மேய்க்கும் குலத்தில் பிறந்த அழகான யசோதை அம்மா கடைந்து வைத்த தயிர் , வெண்ணை மேலே ஆசை வைத்து விரும்பி உண்ணும் கோவலனை, பிராமணர்களுக்கு இனிப்பான அமுதம் போன்றவனை,

குட்டி கண்ணன் முன்பு பொண்ணுங்களோடு கை கோர்த்து கொண்டு அழகா குரவை கூத்தாடியவனை, குடத்தை வரிசையாக தலையில் வைத்து கொண்டு ஒவ்வொரு கைகளிலும் ஒரு குடத்தை வைத்து கொண்டு தலையில் உள்ள குடம் கீழே விழாதவாறு கையில் உள்ள குடத்தை தூக்கி போட்டு பிடித்து ஆடும் குடமாடு கூத்தனை,

முன்பு இந்திரனுக்கு செய்ய வேண்டிய பூஜையை கண்ணன் தடுத்து கோவர்த்தன மலைக்கு செய்யுங்கள் என மக்களிடம் கூற, இதனால் கோபமுற்ற இந்திரன் இடி மின்னலுடன் பயங்கரமான மழையை பெய்விக்க, மிக பெரிய கோவர்த்த மலையையே தூக்கி குடையாக பிடித்து கோகுலத்தில் உள்ள அனைவரையும் காப்பாற்றியவனை, என்னோட இறைவனை கண்டு கொண்டேன் நல்ல மணம் வீசும் சோலைகள் சூழ்ந்துள்ள (மகாபலிபுரம்) கடல் மல்லை தல சயனத்திலே!


கோவர்த்தன மலையை தூக்கும் பெருமாள்

1092
பாய்ந்தானைத் திரி சகடம் பாறி வீழப்* பாலகனாய் ஆல் இலையில் பள்ளி இன்பம்
ஏய்ந்தானை* இலங்கு ஒளி சேர் மணிக் குன்று அன்ன * ஈர் இரண்டு மால் வரை தோள் எம்மான் தன்னை*
தோய்ந்தானை நிலமகள் தோள் தூதில் சென்று* அப்பொய் அறைவாய்ப் புகப் பெய்த மல்லர் மங்கக்
காய்ந்தானை* எம்மானைக் கண்டுகொண்டேன்* கடி பொழில் சூழ் கடல் மல்லைத் தல சயனத்தே* 2.5.5


பாய்ந்தானைத் திரி சகடம் பாறி வீழப் - மாற்றி படிக்க - திரி சகடம் பாரி வீழ பாய்ந்தானை அதாவது உருளுகின்ற சக்கரம் சிதறி அழியும் படி அதன் மேல் காலால் உதைத்தவனை
பாலகனாய் ஆல் இலையில் பள்ளி இன்பம் ஏய்ந்தானை - குழந்தையாய் ஆலமர இலையில் படுத்து இன்பம் அடைந்தவனை
இலங்கு ஒளி சேர் மணிக் குன்று அன்ன - பிரகாசமான ஒளி சேரும் ஜொலிக்கும் மணி குன்று போன்றவனை
ஈர் இரண்டு மால் வரை தோள் - நான்கு பெரிய மலை (போன்ற) தோளை உடையவனை
எம்மான் தன்னை - என் இறைவனான அவனை
தோய்ந்தானை நிலமகள் தோள் - மாற்றி படிக்க - நிலமகள் தோள் தோய்ந்தானை அதாவது பூமி தாயாரின் தோள் அணைத்தவனை
தூதில் சென்று அப்பொய் அறைவாய்ப் - (பாண்டவர்களுக்கு) தூது சென்று அந்த பொய் இருக்கையில் (அமர்ந்து பாதாள அறையில்)
புகப் பெய்த மல்லர் மங்கக் காய்ந்தானை - உள்ளே விழுந்தவுடன் (அங்கிருக்கும்) வலிமை வாய்ந்த வீரர்கள் அழியும்படி கோபம் கொண்டவனை
எம்மானைக் கண்டுகொண்டேன் - என் இறைவனை கண்டு கொண்டேன்
கடி பொழில் சூழ் கடல் மல்லைத் தல சயனத்தே -
மணம் வீசும் பூக்கள் செடி கொடிகள் மரங்கள் சூழ்ந்துள்ள கடல் மல்லை தல சயத்திலே



விளக்கம்:-
கம்சன் கண்ணனை கொல்ல அனுப்பிய அரக்கன் சகடாசுரன் சக்கரம் வடிவில் குழந்தை கண்ணன் மேலே ஏறி கொல்ல வந்தான். விளையாட்டு தனமாக காலை உதைத்து உதைத்து விளையாடி கொண்டே நைசா, அந்த சக்கர வடிவில் வந்த அசுரன் சிதறி அழியும் படி தன் பிஞ்சு காலால் உதைத்தவனை,உலகமே அழிவுக்கு உண்டான போது குழந்தையாய் எல்லா உலகையும் விழுங்கி ஆலமரத்து இலையில் படுத்து கொண்டு இன்பம் அடைந்தவனை,

பிரகாசமான ஒளி வரும் ஜிகு ஜிகுன்னு இருக்கும் மணி குன்று போன்றவனை,
சங்கு ,சக்கரம் அபய , வரத (அபய வரத என்றால் பெருமாள் ஒரு கை மேலே ஆசிர்வாதம் பண்ணுவாரு அதான் , வரத என்றால் ஒரு கையை தன்னோட பாதத்தை காமிப்பாரு அதான் புரிஞ்சுதோ! So சங்கு, சக்கரம், அபய, வரத) என நான்கு பெரிய மலை போல தோள்களை உடைய என் இறைவனான அவனை, நம்ம பூமி தாயாரின் தோளை அன்போடு அணைத்து கொண்டிருப்பவனை,

(*சின்ன வயசுல நம்ம பசங்க ஒரு பள்ளம் ரோட்டுல தோண்டி அதன் மேலே நமக்கு தெரியாம புல்லு,மாதிரி ஏதாவது வைத்து மறைத்து விடுவாய்ங்க! கரெக்டா நம்ம அந்த ரோட்டுல போகும்போது டபக்குன்னு பள்ளத்துல காலை வச்சிடுவோம்! உடனே ஹி ஹி ன்னு சிரிப்பானுங்க நம்ம பசங்க! ஆனால்! இந்த பாவி துரியோதனன் என் அன்பு செல்ல கண்ணனை கொல்ல என்ன செஞ்சான்னு பாருங்க கீழே)முன்பு கண்ணன் பாண்டவர்களுக்காக தூது செல்லும் போது, கண்ணனே பாண்டவர்களின் பெரிய பலம் என்பதை அறிந்த துரியோதனன் சதியால் கண்ணனை கொல்வதற்காக, பூமிக்கு கீழே பெரிய பாதாளம்
அமைத்து அதன் மேல் பொய்யாக சிம்மாசனம் வைத்து, கண்ணனை அதில் உட்கார வைக்க, கண்ணன் டபக்குன்னு உள்ளே விழுந்தவுடன் பாதாளத்தில் ரெடியா கண்ணனை கொல்ல தயாராக இருந்த மல்லர்கள் அழியும்படி , விஸ்வரூபத்துடன் கோபம் கொண்டவனை, என் இறைவனை கண்டு கொண்டேன் நல்ல மணம் வீசும் சோலைகள் சூழ்ந்துள்ள (மகாபலிபுரம்) கடல் மல்லை தல சயனத்திலே!


சகடாசுரனை அழித்த கண்ணன்

1093
கிடந்தானைத் தடங்கடலுள் பணங்கள் மேவிக்* கிளர் பொறிய மறி திரிய அதனின் பின்னே
படர்ந்தானைப்* படு மதத்த களிற்றின் கொம்பு பறித்தானைப்* பார் இடத்தை எயிறு கீற
இடந்தானை* வளை மருப்பின் ஏனம் ஆகி* இரு நிலனும் பெரு விசும்பும் எய்தா வண்ணம்
கடந்தானை* எம்மானைக் கண்டுகொண்டேன்* கடி பொழில் சூழ் கடல் மல்லைத் தல சயனத்தே*2.5.6

கிடந்தானைத் தடங்கடலுள் பணங்கள் மேவிக் - மாற்றி படிக்க - தடங்கடலுள் பணங்கள் மேவி கிடந்தானை அதாவது பெரிய பாற்கடலில் பாம்பு (ஆதிசேஷன்) தலைகளின் கீழே படுத்து கிடந்தானை
கிளர் பொறிய மறி திரிய - (உடல்) மேலெழுந்த புள்ளிகளுடன் மான் குட்டி திரிய
அதனின் பின்னே படர்ந்தானைப் - அதன் பின்னே ஓடியவனை
படு மதத்த களிற்றின் கொம்பு பறித்தானைப் - மாற்றி படிக்க - மதத்த படு அதாவது மதம் உண்டான ஆண் யானையின் கொம்பை பிடிங்கியவனை
பார் இடத்தை எயிறு கீற இடந்தானை - உலகமான பூமியை வாய் கொம்பினால் குத்தி பெயர்த்து எடுத்தவனை
வளை மருப்பின் ஏனம் ஆகி - வளைந்த கொம்போடு பன்றி ஆகி
இரு நிலனும் பெரு விசும்பும் - இப்பெரிய பூமியோடு பெரிய விண் உலகமும்
எய்தா வண்ணம் கடந்தானை - இது போதாது என்ற படி வளர்ந்து (உலகம்) தாண்டியவனை (அளந்தவனை)
எம்மானைக் கண்டுகொண்டேன் - என் இறைவனை கண்டுகொண்டேன்
கடி பொழில் சூழ் கடல் மல்லைத் தல சயனத்தே - மணம் வீசும் பூக்கள் செடி கொடிகள் மரங்கள் சூழ்ந்துள்ள கடல் மல்லை தல சயத்திலே



விளக்கம்:-
மிக பெரிய பாற்கடலில் பல தலைகள் கொண்ட ஆதிசேஷன் மேல் படுத்து கொண்டு இருப்பவனை, இராவணன் சீதையை கடத்தி கொண்டு போக போவதற்காக அவன் மாமன் மாரீசனை மாய மான் உருவில் அனுப்பினான் .அந்த மானை கண்டு மயங்கிய சீதை அந்த மான் வேண்டும் என இராமரிடம் கூற, இராமரும் அன்பு மனைவி ஆசைபட்டாளே! என்று , தம்பி லட்சுமணனை சீதைக்கு பாதுகாப்பாக இருக்க சொல்லி மானை துரத்தி அதன் மேல் அம்பு விட, மாய மான் உருவில் வந்த மாரீசன் தந்திரமாக ராமனை போலவே லட்சுமணா! என்று குரல் கொடுக்க, அங்கிருக்கும் சீதை நம் புருஷன் இராமன்தான் ஆபத்தில் கத்துகிறார் என்று எண்ணி லட்சுமணனை அனுப்பி வைக்க, அந்த சரியான நேரம் பார்த்து இராவணன் சீதையை கடத்தி கொண்டு போனான்.இப்படி அழகான புள்ளிகள் கொண்ட அந்த மான் பின்னாடியே சென்றவனை,

முன்பு கம்சன் கண்ணனை கொல்ல அனுப்பிய மதம் பிடித்த யானையின் கொம்பை பிடுங்கியவனை, பல யுகங்களுக்கு முன்பு இரணியனின் தம்பி இரணியாக்சன் என்ற அரக்கன் பூமியை அலேக்கா தூக்கி கொண்டு கடலுக்கு அடியில் வைத்து விட்டதால் பூமியை காப்பாற்ற வளைந்த கோரை பற்களுடன் பன்றி வடிவம் எடுத்து பூமியை கொம்பினால் குத்தி பெயர்த்து எடுத்து வந்தவனை,

பூமி , பெரிய வானுலகம் இதெல்லாம் போதாது என்பது போல பெரிய உருவத்துடன் வளர்ந்து உலகம் முழுவதையும் தன் மலர் போன்ற திருவடியாலே அளந்தவனை, என் இறைவனை கண்டு கொண்டேன்! நல்ல மணம் வீசும் சோலைகள் சூழ்ந்துள்ள (மகாபலிபுரம்) கடல் மல்லை தல சயனத்திலே!


வராக பெருமாள்

1094
பேணாத வலி அரக்கர் மெலிய அன்று* பெருவரைத் தோள் இற நெரித்து அன்று அவுணர் கோனைப்*
பூண் ஆகம் பிளவு எடுத்த போர் வல்லானைப்* பொரு கடலுள் துயில் அமர்ந்த புள் ஊர்தியை*
ஊண் ஆகப் பேய் முலை நஞ்சு உண்டான் தன்னை* உள்ளுவார் உள்ளத்தே உறைகின்றானை*
காணாது திரி தருவேன் கண்டு கொண்டேன்* கடி பொழில் சூழ் கட மல்லைத் தல சயனத்தே*2.5.7


பேணாத வலி அரக்கர் மெலிய அன்று - விரும்பாத வலிமையான அரக்கர் அழிய அன்று
பெருவரைத் தோள் இற நெரித்து - பெரிய மலை தோள் அழிய முறித்தவனை
அன்று அவுணர் கோனைப் பூண் ஆகம் - முன்பு அரக்கர்களின் மன்னன் (இரணியனின்) நகைகள் அணிந்த மார்பை
பிளவு எடுத்த போர் வல்லானைப் - பிளந்து அழித்த போர் புரிவதில் வல்லவனை
பொரு கடலுள் துயில் அமர்ந்த புள் ஊர்தியை - அலைகள் அடிக்கும் பார் கடலில் தூங்குவது போல படுத்திருக்கும் கருட வாகனம் உடையவனை
ஊண் ஆகப் பேய் முலை நஞ்சு உண்டான் தன்னை - உணவாக பேய் முலையில் தடவியிருந்த விஷத்தை உண்டவன் அவனை
உள்ளுவார் உள்ளத்தே உறைகின்றானை - நினைப்பவர்களின் உள்ளத்தில் வசிப்பவனை
காணாது திரி தருவேன் கண்டு கொண்டேன் - காணாமல் திரிந்து கொண்டிருந்தேன் (இன்று) கண்டு கொண்டேன்
கடி பொழில் சூழ் கட மல்லைத் தல சயனத்தே - மணம் வீசும் பூக்கள் செடி கொடிகள் மரங்கள் சூழ்ந்துள்ள கடல் மல்லை தல சயத்திலே


விளக்கம்:-
முன்பு இறைவனை விரும்பாமல் பல கொடூரமான செயல்களை செய்து கொண்டிருந்த வலிமையான அரக்கர்கள் சாக அவர்களின் மலை போல இருக்கும் தோள்களை ஒரே முறுக்கா முறுக்கி அழித்தவனை,

முன்பு அரக்கர்களின் மன்னனாக இருந்த இரணியனின் ஜிகு ஜிகுன்னு நகைகள் அணிந்த மார்பை ஒரே போடா போட்டு பிளந்த போர் புரிவதில் வல்லவனை, அலைகள் அடிக்கும் பாற்கடலில் ஆதிசேசன் மேலே படுத்து கொண்டு தூங்குவது போல நடித்து கொண்டு நம்மையெல்லாம் பார்த்து கொண்டிருக்கும் கருட வாகனம் உடையவனை.

முன்பு கண்ணனை கொல்ல வந்த பேயான பூதனையின் முலையில் தடவியிருந்த விஷத்தை உணவாக உண்டவனை, தன்னை நினைத்து கொண்டிருப்பவர்களின் உள்ளத்தில் வசிப்பவனை,

இத்தனை நாளாக காணாது எங்கு எங்கோ திரிந்து கொண்டிருந்தேன்! இன்று கண்டு கொண்டேன்! நல்ல மணம் வீசும் சோலைகள் சூழ்ந்துள்ள (மகாபலிபுரம்) கடல் மல்லை தல சயனத்திலே!


இரணியனை அழித்த பெருமாள்


1095
பெண் ஆகி இன் அமுதம் வஞ்சித்தானைப்* பிறை எயிற்று அன்று அடல் அரியாய்ப் பெருகினானை*
தண் ஆர்ந்த வார் புனல் சூழ் மெய்யம் என்னும்* தட வரை மேல் கிடந்தானைப் பணங்கள் மேவி*
எண்ணாணை எண் இறந்த புகழினானை* இலங்கு ஒளி சேர் அரவிந்தம் போன்று நீண்ட
கண்ணானைக்* கண் ஆரக் கண்டு கொண்டேன்* கடி பொழில் சொழ்ழ் கடல் மல்லைத் தல சயனத்தே*2.5.8


பெண் ஆகி இன் அமுதம் வஞ்சித்தானைப் - பெண் ஆகி இனிப்பான அமுதம் (அசுரர்களுக்கு தராமல்) ஏமாற்றியவனை
பிறை எயிற்று அன்று - பிறை போன்ற (வளைந்த கூரான) பற்களுடன் அன்று
அடல் அரியாய்ப் பெருகினானை - வலிமை வாய்ந்த நரசிங்கமாய் (தூணை உடைத்து கொண்டு) வளர்ந்தவனை
தண் ஆர்ந்த வார் புனல் - குளிர்ச்சி பொருந்திய முகுந்த நீரையுடைய ஆறுகள்
சூழ் மெய்யம் என்னும் தட வரை மேல் - சூழ்ந்த திருமெய்யம் என்னும் பெரிய மலை மேல்
கிடந்தானைப் பணங்கள் மேவி - மாற்றி படிக்க - பணங்கள் மேவி கிடந்தானை அதாவது ஆதிசேஷன் பாம்பின் தலைகளின் கீழே படுத்து கொண்டிருப்பவனை
எண்ணாணை - (அன்புள்ளம் கொண்டவர்களால் மனதில்) எண்ணகூடிய்வனை
எண் இறந்த புகழினானை - எண்ணற்ற புகழ் உடையவனை
இலங்கு ஒளி சேர் - பிரகாசமான ஒளி உடைய
அரவிந்தம் போன்று நீண்ட கண்ணானைக் - தாமரை போன்று நீண்ட கண்கள் உடையவனை
கண் ஆரக் கண்டு கொண்டேன் - கண் குளிர கண்டு கொண்டேன்
கடி பொழில் சொழ்ழ் கடல் மல்லைத் தல சயனத்தே - மணம் வீசும் பூக்கள் செடி கொடிகள் மரங்கள் சூழ்ந்துள்ள கடல் மல்லை தல சயத்திலே


விளக்கம்:-
பாற்கடலை கடைந்து எடுத்த, மரணமே ஏற்படாமல் இருக்க செய்யும் இனிப்பான
அமுதத்தை, கெட்டவர்களான அசுரர்களுக்கு கிடைக்காமல் தேவர்களுக்கு கிடைக்க, அழகான ஜில் ஜில்ல்னு ஒரே கில்மாவா மோகினி பெண் உருவம் கொண்டு, அரக்கர்களை மயக்கி இனிப்பான அமுதம் அவர்களுக்கு கிடைக்காமல் ஏமாற்றியவனை,

வானத்துல இருக்கும் பிறையை போல அழகான வளைந்த கூரான பற்களுடன் நரசிங்கமாக தூணை பிளந்து கொண்டு வளர்ந்தவனை, குளிர்ச்சியான நிறைய நீர்நிலைகள் கொண்ட புதுகோட்டை பக்கத்துல திருமெய்யம் என்னும் ஊரில் இருக்கும் பெரிய மலையில் குடைந்து எடுத்த கோவிலில், ஐந்து தலைகள் கொண்ட ஆதிசேசன் மேல் படுத்து கொண்டிருப்பவனை,

அன்பு உள்ளம் கொண்டவர்களால் ஆசையோடு நினைக்க கூடியவனை,
எண்ணற்ற புகழ் உடையவனை, பிரகாசமாக ஒளியுடன் இருக்கும் தாமரை மலர் போன்று நீண்ட கண்கள் உடையவனை கண் குளிர கண்டு கொண்டேன்! நல்ல மணம் வீசும் சோலைகள் சூழ்ந்துள்ள (மகாபலிபுரம்) கடல் மல்லை தல சயனத்திலே!



மோகினி அவதார பெருமாள்


1096
தொண்டு ஆயார் தாம் பரவும் அடியினானைப்* படி கடந்த தாளாளர்க்கு ஆளாய் உய்தல்
விண்டானை* தென் இலங்கை அரக்கர் வேந்தை* விலங்கு உண்ண வழங்கைவாய்ச் சரங்கள் ஆண்டு*
பண்டு ஆய வேதங்கள் நான்கும்* ஐந்து வேள்விகளும் கேள்வியோடு அங்கம் ஆறும்
கண்டானைத்* தொண்டனேன் கண்டு கொண்டேன்* கடி பொழில் சூழ் கடல்மல்லைத் தல சயனத்தே*2.5.9

தொண்டு ஆயார் தாம் பரவும் அடியினானைப் - தொண்டு செய்பவர்கள் போற்றி வழிபடும் திருவடியை உடையவனை
படி கடந்த தாளாளர்க்கு - உலகம் அளந்த தலைவனுக்கு
ஆளாய் உய்தல் விண்டானை - ஆளாய் (இருந்து தப்பித்து கொண்டு) வாழ்வதை தவிர்த்தவனான
தென் இலங்கை அரக்கர் வேந்தை - தென் இலங்கை அரக்கர்களின் மன்னனை (இராவணனை)
விலங்கு உண்ண வழங்கைவாய்ச் - விலங்குகள் உண்ணும்படி வலது திருகையாலே
சரங்கள் ஆண்டு - அம்புகளை தன்வசம் கொண்டு (அழித்தவனை)
பண்டு ஆய வேதங்கள் நான்கும் - பழமையான வேதங்கள் (ரிக், யஜூர், சாம, அதர்வண என நான்கும் ஆனவனை
ஐந்து வேள்விகளும் கேள்வியோடு - பிரம்ம வேள்வி, தேவ வேள்வி, பூத வேள்வி, பித்ரு வேள்வி, மனித வேள்வி
என ஐந்து வேள்வியோடு தர்ம சாஸ்திரங்களோடு
அங்கம் ஆறும் கண்டானைத் - சீக்ஷை, வ்யாகரணம், சந்தஸ், நிருக்தம், ஜ்யோதிஷம், கல்பம் என வேத அங்கம் ஆறிலும் நிறைந்து இருப்பவனை
தொண்டனேன் கண்டு கொண்டேன் - தொண்டனாகிய நான் கண்டு கொண்டேன்
கடி பொழில் சூழ் கடல்மல்லைத் தல சயனத்தே - மணம் வீசும் பூக்கள் செடி கொடிகள் மரங்கள் சூழ்ந்துள்ள கடல் மல்லை தல சயத்திலே!


விளக்கம்:-
ஆர்வத்தோடு தொண்டு செய்யும் தொண்டர்கள் அன்போடு வழிபடும் மலர் போன்ற அழகான திருவடிகளை உடையவனை, ரெண்டே அடியாலே உலகம் முழுதும் அளந்த இறைவனுக்கு ஆளாய் இருந்து வாழ்வதை தவிர்த்தவனான இந்தியாவின் தெற்கில் உள்ள இலங்கையில் உள்ள அரக்கர்களுக்கு மன்னனாய் இருந்த அந்த பாவி இராவணனை விலங்குகள் உண்ணும்படி தனது வலது கையாலே அம்புகளை கொண்டு அவனை அழித்தவனை,

ரிக் யஜூர் சாம அதர்வண என பழமையான நான்கு வேதங்களிலும்,
பிரம்ம வேள்வி - வேதம் ஓதுதல் , தேவ வேள்வி - வேள்வித் தீயில் உணவில் ஒரு பகுதியை இடுதல், பூத வேள்வி - நாய், பூனை, காக்கைக்கு உணவிடுதல், பித்ரு வேள்வி - இறந்தவர்களை பூஜித்து உணவு வைத்து திருப்தி படுத்தி உணவின் ஒரு பகுதியை அளித்தல், மனித வேள்வி - விருந்தினருக்கு உணவளித்தல், தானம் செய்தல் என ஐந்து வேள்விகளிலும்,

தர்ம சாஸ்திரங்களோடு, சீக்ஷை, வ்யாகரணம், சந்தஸ், நிருக்தம், ஜ்யோதிஷம், கல்பம் என வேதத்தின் ஆறு அங்கங்களில் (ரொம்ப குழம்புதோ! ஒன்னும் இல்லீங்க! நான்கு வேதம் இருக்குல்ல! அதில் இருக்கும் பிரிவுகளைதான் அங்கம்னு சொல்வாங்க!
மேலே இருக்கும் ஆறும் வேதத்துக்கு மூக்கு ,வாய், கால், காது, கண், கை என்பர். இப்படி
வேதங்களிலும், வேள்விகளிலும், ஆறு வேத அங்கங்களிலும் ) நிறைந்து இருப்பவனை,
தொண்டனான நான் கண்டு கொண்டேன் ! நல்ல மணம் வீசும் சோலைகள்
சூழ்ந்துள்ள (மகாபலிபுரம்) கடல் மல்லை தல சயனத்திலே!

1097
பட நாகத்து அணைக் கிடந்து அன்று அவுணர் கோனைப்* பட வெகுண்டு இடை போய் பழன வேலித்*
தடம் ஆர்ந்த கடல் மல்லைத் தல சயனத்துத்* தாமரைக் கண் துயில் அமர்ந்த தலைவன் தன்னைக்*
கடம் ஆரும் கருங்களிறு வல்லான்* வெல் போர்க் கலிகன்றி ஒலி செய்த இன்பப்பாடல்*
திடம் ஆக இவை ஐந்தும் ஐந்தும் வல்லார்* தீவினையை முதல் அரிய வல்லார் தாமே*2.5.10


பட நாகத்து அணைக் கிடந்து - படமெடுத்து கொண்டு இருக்கும் ஆதிசேஷன் மேலே படுத்து கொண்டிருப்பவனை
அன்று அவுணர் கோனைப் பட வெகுண்டு - அன்று அரக்கர்களின் மன்னன் (இரணியனை) அழிக்க கோபம் கொண்டு (தூணை பிளந்து கொண்டு நசிங்க உருவம் கொண்டு வந்தவனை)
மருது இடை போய் - இரண்டு மருத மரங்களுக்கு இடையில் போய் (இருவரின் சாபம் நீக்கியவனை)
பழன வேலித் தடம் ஆர்ந்த - வயல்வெளிகள் மற்றும் நீர்நிலைகள் நிறைந்த
கடல் மல்லைத் தல சயனத்துத் - (மகாபலிபுரம் என்ற)கடல் மல்லைத் தல சயனத்தில்
தாமரைக் கண் துயில் அமர்ந்த தலைவன் தன்னைக் - தாமரை போல அழகான கண்கள் கொண்டு தூங்குவது போல படுத்து கொண்டிருக்கும் தலைவனான அவனை
கடம் ஆரும் கருங்களிறு வல்லான் - மதம் கொண்ட கருமையான ஆண் யானையை நடத்த வல்லவனும்
வெல் போர்க் கலிகன்றி ஒலி செய்த இன்பப்பாடல் - போரில் வெற்றியை பெரும் போர்வீரன் ஓசையுடன் பாடிய இன்பமயமான பாடல்
திடம் ஆக இவை ஐந்தும் ஐந்தும் வல்லார் - துணிவாக இவை பத்தும் சொல்ல வல்லவர்கள்
தீவினையை முதல் அரிய வல்லார் தாமே - தீய செயல்களால் உண்டான பாவங்களை வேரோடு நீக்க வல்லவர்கள் ஆவார்கள்.


விளக்கம்:-
தலைகளை தூக்கி படமெடுத்து கொண்டு மெத்தை போல மெத்து மெத்துன்னு இருக்கும் மிக பெரிய பாம்பான ஆதிசேஷன் மேலே படுத்து கொண்டிருப்பவனை, முன்பு அரக்கர்களின் மன்னனான இரணியனை அழிக்க நரசிங்க உருவம் கொண்டு தூணில் இருந்து வெளி வந்தவனை,

கண்ணன் குழந்தையாக இருக்கும்போது வெண்ணை திருடி உண்டாயே! என்று யசோதை அம்மா கண்ணனை உரலில் கட்டி விட, உரலை இழுத்து கொண்டு ஒன்றோடொன்று இணைந்த இரு மருத மரங்களுக்கு இடையில் தவழ்ந்து சென்று மரங்களை ஒடித்து, மரமாகும் படி முன்பு நாரதரால் சாபம் பெற்ற இருவரின் சாபம் நீக்கியவனை,

நிறைய பச்சை பசேல் என்று இருக்கும் வயல்வெளிகள் அவற்றோடு நீர்நிலைகள் நிறைந்து காணப்படும் (மகாபலிபுரம்) கடல் மலை தல சயனத்தில் தாமரை போல அழகான கண்களுடன் தூங்குவது போல ஜம்முனு படுத்து கொண்டிருக்கும் என் தலைவனான அவனை,

மதம் பிடித்த கருப்பான ஆண் யானையும் திறமையாக நடத்த வல்லவனும், போரில் வெற்றியை பெரும் கலிகன்றி என்னும் திருமங்கையன் இசையுடன் பாடிய இன்பமயமான பாடல் பத்தும் துணிவோடு என்னை போலவே பெருமாளுடன் அன்பு கொண்டு சொல்ல வல்லவர்கள் தீமையான செயல்களால் உண்டான பாவங்கள் அனைத்தையும் வேரோடு நீக்க வல்லவர்கள் ஆவார்கள்.


மூலவர் : ஸ்தல சயன பெருமாள்
உற்சவர்: உலகுய்ய நின்றான்
அம்மன்/தாயார் : நிலமங்கை தாயார்

மங்களாசாசனம்: திருமங்கை ஆழ்வார்:- 26 பாசுரம்
பூதத்தாழ்வார் - 1 பாசுரம்

திருகடல் மல்லைசயன திருத்தலம் அமைந்துள்ள இடம்:-

INDIA – TAMILNADU - சென்னையிலிருந்து 64KM தொலைவில் உள்ளது . மகாபலிபுரம் பீச்சுக்கு போய் இருக்கீங்களா! அதுக்கு பக்கதுலதாங்க இருக்கு! நம்ம ஸ்தல சயன பெருமாள் ஜம்முனு பூமியின் மேலே அதாவது தரையில அழகா படுத்துக்கொண்டு காட்சி தராரு! எவ்ளோ அழுகு தெரியுமா SO NICE!



திருகடல் மல்லைத் தல சயன பெருமாள் திருவடிகளே சரணம்!
திருகடல் மல்லைத் தல சயன பெருமாளின் திருவடிகளுக்கு சமர்ப்பணம்!